तंत्रशिक्षण मंडळातर्फे १२ जूनला समुपदेशन

दहावी-बारावीनंतर विद्यार्थ्यांना पॉलिटेक्निक डिप्लोमाविषयी विद्यार्थ्यांना मार्गदर्शन मिळावे व उद्योजकांकडून नोकरी व व्यवसायाच्या संधींबाबत माहिती मिळावी यासाठी महाराष्ट्र राज्य तंत्रशिक्षण मंडळातर्फे दि. १२ जून रोजी अभियांत्रिकी पदविका समुपदेशन २०१९ हा लाइव्ह ब्रॉडकास्टिंग मार्गदर्शनपर उपक्रम राबविला जाणार आहे.

नाशिक : दहावी-बारावीनंतर विद्यार्थ्यांना पॉलिटेक्निक डिप्लोमाविषयी विद्यार्थ्यांना मार्गदर्शन मिळावे व उद्योजकांकडून नोकरी व व्यवसायाच्या संधींबाबत माहिती मिळावी यासाठी महाराष्ट्र राज्य तंत्रशिक्षण मंडळातर्फे दि. १२ जून रोजी अभियांत्रिकी पदविका समुपदेशन २०१९ हा लाइव्ह ब्रॉडकास्टिंग मार्गदर्शनपर उपक्रम राबविला जाणार आहे.
व्यावसायिक शिक्षणातील करिअरचा पर्याय म्हणून अनेक विद्यार्थी दहावी-बारावीनंतर अभियांत्रिकी पदविका पॉलिटेक्निक डिप्लोमा या अभ्यासक्रमाला प्रवेश घेण्याचा विचार करतात. गेल्या दोन ते तीन वर्षांपासून पॉलिटेक्निककडे विद्यार्थ्यांचा कल कमी झाला असला तरी डिप्लोमानंतर लघु उद्योगांसह मोठ्या औद्योगिक कंपन्यांमध्ये चांगल्या रोजगाराच्या संधी उपलब्ध होत आहे.
औद्योगिक क्षेत्रातील संधीकडे अद्यापही विद्यार्थी या क्षेत्राकडे सकारात्मकतेने पाहतात. त्याच्या या सकारात्मकतेला निर्णयात परिवर्तित करण्यासाठी विद्यार्थ्यांना या उपक्रमाचा लाभ होणार आहे. त्यामुळे तंत्रज्ञानाकडे विद्यार्थ्यांचा कल कमी झालेला दिसत असला तरी पदविका मिळविल्यानंतर रोजगाराच्या संधी मात्र उपलब्ध आहेत. नाशिक, औरंगाबादसह राज्यभरातील सर्व पॉलिटेक्निक महाविद्यालयांत सकाळी १० ते दुपारी २ यावेळेत हा कार्यक्रम लाइव्ह दाखविण्यात येणार असून, यात तंत्रशिक्षण संचालनालयाचे संचालक डॉ. अभय वाघ आणि एमसबीटीईचे संचालक डॉ. विनोद मोहितकर यांचे तंत्रशिक्षण क्षेत्रातील संधी विषयावर मार्गदर्शन करणार आहेत.
या संधीचा विद्यार्थ्यांनी लाभ घेण्याचे आवाहन तंत्रशिक्षण मंडळाचे सहसंचालक प्रा. ज्ञानदेव नाठे यांनी केले आहे. यात दहावी व बारावीचे विद्यार्थी सहभागी होऊ शकतील. सामनगाव येथील शासकीय तंत्रनिकेतन महाविद्यालयासह सर्वच तंत्रनिकेतनमध्ये हा कार्यक्रम दाखविण्यात येणार असल्याचे त्यांनी सांगितले.
महाविद्यालयांना मार्गदर्शन
तंत्रशिक्षण मंडळाच्या नाशिक विभागीय कार्यालयातर्फे शुक्रवारी (दि.७) उत्तर महाराष्ट्रातील नाशिकसह, धुळे, नंदुरबार, जळगाव व अहमदनगर या पाचही जिल्ह्यांतील सुमारे १२५ महाविद्यालयांतील विद्यार्थ्यांना डीटीईचे सहायक संचालक प्रा. संजय पगार व प्रा. लक्ष्मीकांत पाटील यांनी मार्गदर्शन केले.