विवाहितेला गळफास घेण्यास प्रवृत्त केल्याने सासरच्या लोकांवर गुन्हा

पंचवटी : विवाहितेचा वारंवार शारीरिक, मानसिक छळ करत तिला आत्महत्या करण्यास प्रवृत्त केल्याने पतीसह सासूविरुद्ध आडगाव पोलीस ठाण्यात गुन्हा दाखल करण्यात आला आहे.

शिल्पा पंकज अहेर या विवाहितेने हनुमान नगर येेथील राहत्या घरी पंख्याला साडी बांधून गळफास घेत आत्महत्या केल्याची घटना उघडकीस आली होती. मयत विवाहितेचा संशयित पती पंकज भास्कर अहेर हा वारंवार दारू पिऊन पत्नीला शिवीगाळ व मारहाण करायचा तर सासू लता भास्कर अहेर ही विवाहितेने माहेरहून पैसे आणावेत, यासाठी तिच्याकडे वारंवार पैशांची मागणी करत होती, असे फिर्यादीत म्हटले आहे. संशयित पंकज याचे लग्नानंतरही बाहेर प्रेमसंबंध होते व तो देखील माहेरहून पैसे आणण्यासाठी पत्नी शिल्पावर दबाव टाकत होता, असेही फिर्यादीत म्हटले आहे. पती व सासू यांच्याकडून वारंवार होणाऱ्या मानसिक, शारीरिक छळाला कंटाळून शिल्पाने राहत्या घरी बेडरूममध्ये असलेल्या पंख्याला गळफास घेऊन आत्महत्या केली.

याबाबत मयत विवाहितेचे मालेगाव येथे राहणारे नातेवाईक योगेश सुरेश आहेर यांनी आडगाव पोलीस ठाण्यात तक्रार दाखल दिली आहे. वरिष्ठ पोलीस निरीक्षक इरफान शेख यांच्या मार्गदर्शनाखाली अधिक तपास सुरू आहे.