...अन् 'तो' वाद टोकाला गेला; पत्नीवर गोळीबार करत पतीचीही आत्महत्या

नाशिक : घरगुती वादातून पत्नीवर गोळीबार करून पतीने स्वतःवर गोळी झाडून आत्महत्या केल्याची घटना गुरुवारी (दि.१४) पहाटे येवला येथील बाजीरावनगर ब या भागात घडली आहे. या गोळीबारात पत्नी गंभीर जखमी झाली असून तिच्यावर नाशिक येथील रुग्णालयात उपचार सुरू आहेत. सदर घटनेने शहरात खळबळ उडाली आहे.

याबाबत प्राथमिक माहिती अशी की, शहरातील बाजीरावनगर ब या भागात राहणाऱ्या किरण आनंदा दुकळे (४०) यांच्या घरात घरगुती कारणावरून सतत वाद होत असत. मात्र, या वादाने टोकाचे रूप धारण केले. दुकळे यांनी स्वतःजवळच्या पिस्तुलातून पत्नी वैशाली हिचेवर गोळीबार केला. यात वैशाली गंभीर जखमी झाली. सदर घटना पहाटेच्या सुमारास घडली. पाटबंधारे विभागात कालवा निरीक्षक असणाऱ्या दुकळे यांच्याकडे पिस्तूल कोठून आले, असा प्रश्न उपस्थित होत असून, शहर पोलीस अधिक तपास करत आहे. सदर घटनेची माहिती कळताच मनमाडचे उपविभागीय पोलीस अधिकारी समीरसिंह साळवे, शहर पोलीस निरीक्षक भगवान मथुरे, पोलीस उपनिरीक्षक सूरज मेढे आदींनी घटनास्थळी धाव घेतली. घटनास्थळी फॉरेन्सिक लॅबच्या तज्ज्ञांना पाचारण करण्यात आले असून गुन्हा दाखल करण्याची प्रक्रिया सुरू आहे.