'सीआरपीएफ'चे कमांडो रवींद्र सहारे यांचे नाशिकमध्ये अपघाती निधन

सीआरपीएफचे-रवींद्र सहारे हे  नाशिकच्या हरसूलजवळ पेठ तालुक्यात येणाऱ्या मुळ कुळवंडी गावचे भुमीपुत्र होते.

नाशिक : केंद्रीय राखीव पोलीस दलातील (सीआरपीएफ) कमांडो हवालदार रवींद्र राजाराम सहारे (४२,रा.मुळ, कुळवंडी गाव, ता.पेठ) यांचे मंगळवारी हरसूलजवळील पालीफाटा येथे अपघातात निधन झाले. त्यांच्या अशा अपघाती निधनाने नाशिक जिल्ह्यात हळहळ व्यक्त होत आहे. 

सीआरपीएफचे-रवींद्र सहारे हे  नाशिकच्या हरसूलजवळ पेठ तालुक्यात येणाऱ्या मुळ कुळवंडी गावचे भुमीपुत्र होते. ते मागील अनेक वर्षांपासून सीआपीएफमध्ये कर्तव्यावर राहून देशसेवा बजावत होते. अलीकडेच त्यांना पदोन्नती मिळाल्याने कुटुंबीयांत आनंदाचे वातावरण होते. त्यांचे वडील राजाराम सहारे हे शेतकरी असून रवींद्र सहारे हे त्यांचे एकुलते एक चिरंजीव होते. त्यांच्या पश्चात पत्नी, आई, वडील, दोन शाळकरी मुले असा परिवार आहे. त्यांच्या अपघाती निधनाने हरसुलसह संपुर्ण पेठ तालुक्यात शोककळा पसरली आहे. ते दोन ते तीन दिवसांसाठी जम्मु-काश्मिर येथून राहत्या घरी कुटुंबीयांच्या भेटीसाठी आले होते.

वर्षभरानंतर ते सीआरपीएफच्या सेवेतून सेवानिवृत्त होणार होते. तत्पुर्वीच काळाने त्यांच्यावर घाला घातला. मंगळवारी हरसूल गावातून ते दुचाकीने दोघा ओळखीच्या लोकांसोबत संध्याकाळी साडेसात वाजेच्या सुमारास कुळवंडी गावाकडे जात होते. यावेळी मुख्य रस्त्यावरील पालीफाटा याठिकाणी एका भरधाव जाणाऱ्या टाटा सुमो जीपने धडक दिली. या धडकेत ते गंभीररित्या जखमी झाले. त्यांना हरसूल ग्रामिण रूग्णालयात उपचारासाठी दाखल करण्यात आले; मात्र उपचारादरम्यान त्यांचा मृत्यु झाला. त्यांच्यासोबत असलेल्या दोघा इसमांवर रूग्णालयात उपचार सुरू असल्याचे हरसूल पोलिस ठाण्याचे सहायक पोलीस निरिक्षक गणेश म्हस्के यांनी सांगितले.

घटनास्थळाहून अपघातग्रस्त सुमो कार सोडून चालक फरार झाला आहे. त्याचा शोध सुरू असल्याचे म्हस्के म्हणाले. सहारे यांच्या अपघाती निधनाबाबतची माहिती त्यांच्या सीआरपीएफच्या पुलवामा येथील युनिटला कळविण्यात आली होती. मुंबई येथून त्यांच्या दलाचे एक पथक अंत्यसंस्कारासाठी हरसूल गावात दाखल होणार आहे. सायंकाळी पाच वाजेपर्यंत त्यांच्या मुळ गावी कुळवंडी येथे अंत्यसंस्कार करण्यात येतील, अशी माहिती म्हस्के यांनी दिली.