नृत्य, अभिनयातून उलगडले ‘ती’चे अवकाश

पावसाच्या सरींनंतर वातावरणात आलेला गारवा, नाशिककर कलाकार महिलांकडून सादर होत असलेले सहजसुंदर नाटक, त्याला तितक्याच दमदारपणे मिळत असलेली संगीतसाथ, नाटकाच्या संवाद, अभिनय आदींमधून व्यक्त होत असलेले भाव यामुळे रसिक श्रोते भारावून गेले होते.

नाशिक : पावसाच्या सरींनंतर वातावरणात आलेला गारवा, नाशिककर कलाकार महिलांकडून सादर होत असलेले सहजसुंदर नाटक, त्याला तितक्याच दमदारपणे मिळत असलेली संगीतसाथ, नाटकाच्या संवाद, अभिनय आदींमधून व्यक्त होत असलेले भाव यामुळे रसिक श्रोते भारावून गेले होते. निमित्त होते, ‘ती अवकाश, आकाश’चे. जनस्थान फेस्टिव्हलअंतर्गत परशुराम साईखेडकर नाट्यगृहात शुक्रवारी (दि. २२) सायंकाळी हा कार्यक्रम पार पडला.
मराठी रंगभूमीवरील स्त्रियांचा प्रवास या नाटकातून अभिनवपणे रेखाटण्यात आला. ज्येष्ठ नृत्यांगना विद्या देशपांडे, कीर्ती भवाळकर व सुमुखी अथणी यांच्या नृत्याने नाटकास प्रारंभ झाला. निवेदनावर आधारित नृत्य सादर करीत अनादी काळापासून चालत आलेला व आजही महिलांमध्ये असणारा आत्मविश्वास, स्त्रीशक्ती यांचे सादरीकरण त्यांनी नृत्यातून केले. त्यानंतर पल्लवी पटवर्धन, अपर्णा क्षेमकल्याणी यांनी परदेशातील महिला परिषदेत सहभागी होणाऱ्या दोन भारतीय स्त्रिया व त्यांचे भारतीय महिला सक्षमीकरणाच्या सद्यस्थितीचे चित्रण आपल्या संवादाद्वारे सादर केले. त्याचेच सूत्र गुंफत ‘शारदा’ नाटकातील काही प्रसंग अभिनेत्री अदिती मोराणकर, गायिका प्रांजली बिरारी यांनी सादर केले. या नाटकातील शारदेचे श्रीमंताघरी ठरलेले लग्न, उपवर मुलगा म्हातारा असल्याने नाराज झालेली व आपली नाराजी गाण्यांमधून सादर करणारी शारदा, सत्यस्थिती समजल्यावर मुलीच्या पाठीशी ठामपणे उभी राहणारी तिची आई असा प्रसंग यावेळी प्रभावीपणे सादर करण्यात आला. त्यानंतर मराठी रंगभूमीवरील आजवरचा स्त्रीशक्तीच्या प्रचितीचा प्रवास नृत्य, नाट्य, अभिनयाद्वारे सादर करण्यात आला.  रसिकांच्या टाळ्यांच्या कडकडाटाने व वन्समोअरने सभागृह दणाणून गेले होते. यात विद्या करंजीकर, हेमा जोशी, नेहा जोशी, अर्चना निपाणकर, धनश्री क्षीरसागर, रेखा केतकर, लक्ष्मी पिंपळे, श्रेया जोशी, प्रिया तुळजापूरकर, रागिणी कामतीकर आदींनी प्रभावीपणे विविध भूमिका निभावल्या. या नाटकाचे दिग्दर्शन सुनील देशपांडे यांनी केले. सुभाष दसककर, नितीन पवार, नितीन वारे यांनी संगीतसाथ केली. आनंद ढाकीफळे यांचे नेपथ्य, तर प्रकाशयोजना विनोद राठोड व ईश्वर जगताप यांची होती. वेशभूषा स्नेहल एकबोटे यांची, तर रंगभूषा माणिक कानडे, ललित निकम यांनी केली होती. अपर्णा क्षेमकल्याणी यांनी निवेदन केले. कार्यक्रमास रसिक श्रोते मोठ्या संख्येने उपस्थित होते.