हेरगिरीमुळे अटकेत असलेल्या दीपकचा जामीन नामंजूर

व्हॉट्सॲपद्वारे एका अनोळखी महिलेसोबत ओळख झाली आणि या ओळखीतून दीपक हा पाकिस्तानच्या ‘हनी ट्रॅप’मध्ये अडकला होता. त्याने अनोळखी महिलेच्या सांगण्यावरून थेट हिंदुस्तान एरोनॉटिक्स लिमिटेड (एचएएल) येथील प्रतिबंधित क्षेत्राची व तेथे तयार केले जाणाऱ्या भारतीय बनावटीच्या लढाऊ सुखोई विमानांची तसेच त्यांच्या अन्य संवेदनशील भागाची व इतर सुरक्षासंबंधित गोपनीय माहिती सोशल मीडियावरून महिलेला पुरविल्याची धक्कादायक बाब एटीएसच्या पथकाने दोन महिन्यांपूर्वी उघडकीस आणली होती. दीपकला बेड्या ठोकल्यानंतर त्यास न्यायालयाने सुरुवातीला पोलीस कोठडी सुनावली होती. यामुळे दीपकची रवानगी कारागृहात करण्यात आली. दरम्यान, दीपकने जामिनासाठी न्यायालयात अर्ज केला होता. त्यात सरकारी पक्षातर्फे दहशतवादविरोधी पथकाचे विशेष सरकारी वकील अजय मिसर यांनी युक्तिवाद केला. त्यांनी न्यायालयात दीपकने पाकस्थित लोकांना संवेदनशील माहिती पुरवल्याबाबत न्यायालयात पुरावे सादर केले. त्यात दीपकने पाकिस्तानला पुरवलेली माहिती मिळवणे अतिशय अवघड असतानाही ती माहिती मिळवून पाकिस्तानला पाठवली. त्यामुळे देशाच्या सुरक्षाव्यवस्थेकरिता व संरक्षण खात्याच्या एचएएलसारख्या कारखान्याच्या सुरक्षेच्या दृष्टीने ही बाब अत्यंत घातक ठरणारी असल्याचे मिसर न्यायालयात म्हणाले. न्यायालयाने दोन्ही बाजूंचा युक्तिवाद ऐकून घेत दीपकचा जामीन अर्ज फेटाळून लावला.

---इन्फो--

चाैकशीत धक्कादायक माहिती

संशयित दीपककडे राज्याच्या दहशतवादविरोधी पथकाने केलेल्या चौकशीतून अत्यंत गंभीर स्वरूपाची धक्कादायक माहिती समोर आली. एचएएलच्या भारतीय बनावटीच्या विमानांची गोपनीय माहिती जी अत्यंत संवेदनशील आहे, ती पाकच्या गुप्तहेर संस्थेच्या हस्तकांपर्यंत पोहचविली.

तसेच भारतीय वायुदलाच्या लढाऊ विमानातील मिसाइल व रॉकेटलाँचरबाबत तांत्रिक माहितीही उघड केल्याचे समोर येत आहे. तपासात काही संशयास्पद व्यक्तींचे फोन क्रमांक निष्पन्न झाले असून, याबाबत सविस्तर माहिती तपासी यंत्रणेकडून घेतली जात आहे.