बाधित संख्येत दुपटीने भर !

नाशिक : जिल्ह्यात नवीन रुग्णसंख्येत दुपटीने भर पडली असून बुधवारी (दि. २३ ) एकूण ३३८ रुग्णांची भर पडली आहे. तर गत गुरुवारपासूनच्या आठवडाभरात १२३३ रुग्ण वाढ झाली आहे. दरम्यान, बुधवारी पोर्टलवर पुन्हा ६९ बळींची नोंद झाली असून प्रत्यक्षात दिवसभरात ४ रुग्ण दगावले आहेत.

जिल्ह्यात आठवडाभरापासून नवीन रुग्णसंख्येतील वाढ सातत्याने १०० ते २०० मध्ये कायम होती. मात्र, बुधवारी अचानकपणे त्यात लक्षणीय वाढ झाली आहे. नवीन ३३८ रुग्ण तर १३६ रुग्ण बरे होऊन घरी परतले आहेत. नवीन ३३८ बाधितांमध्ये २३६ नाशिक ग्रामीणचे, ९६ नाशिक मनपाचे, २ मालेगाव मनपाचे तर ४ जिल्हाबाह्य रुग्णांचा समावेश आहे. तर पोर्टलवर अपडेट करण्यात आलेल्या ६९ मृत्यूंमध्ये ३९ रुग्ण नाशिक मनपाचे तर ३० रुग्ण नाशिक ग्रामीणचे आहेत. तर दिवसभरातील ४ बळींमध्ये ३ ग्रामीणचे तर १ नाशिक मनपाचा आहे. दरम्यान, जिल्ह्यात एकूण बळींची संख्या ८११४ वर पोहोचली आहे. तर उपचारार्थी रुग्णसंख्येत वाढ होऊन ती २५३८ वर गेली असून कोरोनामुक्ततेच्या दरात घसरण होऊन ते प्रमाण ९७.२९ वर पोहोचले आहे.

इन्फो

पॉझिटिव्हीटी रेट ३ टक्क्यांवर

जिल्ह्यात गत आठ ते दहा दिवसांपासून पॉझिटिव्हीटी रेट साधारणपणे दीड टक्क्यांच्या आसपास होता. मात्र, बुधवारी पॉझिटिव्हीटी रेट अचानकपणे वाढून ३.०४ टक्के झाला आहे. एक दिवसात पॉझिटिव्हीटी रेटमध्ये जवळपास दुपटीने वाढ झाल्याने हा दर चिंतेत भर घालणारा ठरणार आहे.

आठवडाभरातील बाधित रुग्णसंख्या

१७- १५८ १८- १९८

१९- ११४

२०- १३६

२१- १०६

२२- १८३

२३ - ३३८