प्रमुख रस्त्यांसह मुख्य बाजारपेठांमध्येही शुकशुकाट

लोकमत न्यूज नेटवर्क

नाशिक : शहरात झपाट्याने वाढणारी कोरोनाची रुग्णसंख्या आणि शासनाने लागू केलेल्या कडक निर्बंधांमुळे पोलिसी दंडुक्याच्या भीतीने सलग पाचव्या वीकेंड बंदलाही नाशिककरांनी प्रतिसाद दिला. त्यामुळे शहरातील विविध रस्त्यांसह मुख्य बाजारपेठांमध्येही अपवाद वगळता शनिवारी (दि. ९) शुकशुकाट दिसून आला.

कोरोनामुळे सलग पाचव्या शनिवारीही नाशिककर घरातच थांबले. त्यामुळे शहरातील मुख्य बाजारपेठेसह, उपनगरे आणि रस्त्यांवर शुकशुकाट दिसत होता. गत आठवड्यात राज्य मंत्रिमंडळाच्या बैठकीत झालेल्या निर्णयानुसार वीकेंडला वैद्यकीय सेवा वगळता सर्व दुकाने बंद होती. शहरात दररोज हजारोंच्या संख्येने रुग्णांची संख्या वाढत असताना रुग्णांना आवश्यक बेड, ऑक्सिजन व रेमडेसिवीर यासारखी औषधे उपलब्ध होत नसल्याने अनेकांनी कोरोनाचा धसका घेत घराबाहेर पडणे टाळले. शहरात कोरोना रुग्णांची संख्या झपाट्याने वाढत असताना शासनाने लागू केलेले कडक निर्बंध लागू केले असून, या निर्बंधांच्या अंमलबजावणीसाठी पोलीसही रस्त्यावर असल्याने पोलिसी दंडुक्याची भीती आणि तापमानाचा चाळिशीपर्यंत वाढलेला पारा यामुळे नाशिककरांनी घरातच बसणे पसंत केले.

कोरोनाची साखळी तोडण्यासाठी राज्य मंत्रिमंडळाच्या बैठकीत सोमवार ते शुक्रवार दिवसा जमावबंदी आणि रात्री संचारबंदीसह विविध कडक निर्बंध घालण्यात आले आहे, तर आठवड्याच्या शेवटी शनिवार आणि रविवारी या निर्बंधांची पोलिसांकडून आणखी काटेकोर अंमलबजावणी केली जात आहे. त्यामुळे अत्यावश्यक सेवा वगळता शहरातील सर्व दुकाने बंद होती. दरम्यान, काही नागरिक दुचाकी आणि चारचाकी वाहनांमधून बाहेर पडताना दिसले. मात्र, यात वैद्यकीय कारणासाठी घराबाहेर पडणाऱ्या नागरिकांचे प्रमाण अधिक होते. काही ठिकाणी किरकोळ प्रमाणात भाजीपाला आणि फळ विक्रेते रस्त्यावर असले तरी त्यांना तासनतास ग्राहकांची प्रतीक्षा करावी लागली.

मुख्य रस्ते, बाजारपेठेत शुकशुकाट

नेहमीच ग्राहकांची वर्दळ असलेल्या शहरातील मुख्य रस्ते व बाजारपेठेतील रविवार कारंजा, मेनरोड, शालीमार परिसरात शनिवारी शुकशुकाट होता. गेल्या आठवड्यात जीवनावश्यक सेवा वगळता इतर दुकाने बंद ठेवण्याचा निर्णय मंत्रिमंडळाच्या बैठकीत घेण्यात आल्यानंतर या भागातील गर्दीवर नियंत्रण आले असून, शनिवारी सर्वत्र शांतता दिसत होती.