विधानसभा मतमोजणीमुळे रविवारी वाहतूक मार्गात बदल

विधानसभा मतमोजणीमुळे रविवारी वाहतूक मार्गात बदल

नाशिक : शहरातील चार मतदारसंघांबरोबरच इगतपुरी मतदारसंघाची मतमोजणीही वेगवेगळ्या ठिकाणी होणार असल्याने त्या-त्या ठिकाणी गर्दी होऊन कायदा व सुव्यवस्थेचा तसेच वाहतूक कोंडीचा प्रश्न निर्माण होऊ शकतो़ त्यामुळे पोलीस उपआयुक्त निसार तांबोळी यांनी काही मार्गावरील वाहतूक मार्गात बदल केले आहेत़ रविवारी (दि़ १९) सकाळी ६ ते दुपारी ३ या कालावधीपर्यंत या मार्गांवर सर्व प्रकारच्या वाहनांना प्रवेश बंद असणार आहेत़
नाशिक पूर्व व पश्चिम या दोन मतदासंघाची मतमोजणी अंबड वेअर हाऊस येथे होणार आहे़ त्यामुळे तेथील मार्गावर पुढीलप्रमाणे बदल करण्यात आले आहेत़
ग्लॅक्सो कंपनी मेनगेट - ग्राफाईट कंपनी- सिबल- संजीवनी बॉटनिक नर्सरीपर्यंतच्या मार्गावर दोन्ही बाजूने ये-जा करणाऱ्या सर्व प्रकारच्या वाहनांना वाहतुकीसाठी प्रवेश बंद करण्यात येणार आहे़ या मार्गाने जाणाऱ्या वाहनधारकांना संजीवनीनगर - एक्स्लो कंपनी- गरवारे टी पॉर्इंटपासून इतरत्र जाता येईल़
जी़ पी़ इलेक्ट्रॉनिक्स - महेश कंपनी - संजीवनी बॉटनिक नर्सरी - सेंट्रल वेअर हाऊस कार्पोरेशन ते एम़एस़ई़बी. पॉवर हाऊसचे वॉलकंपाऊंच्या सुरुवातीच्या टोकापर्यंत अंबड वेअर हाऊस समोरील मुख्य रस्ता दोन्हीही बाजूने ये-जा करणाऱ्या सर्व प्रकारच्या वाहनांना वाहतुकीसाठी बंद करण्यात येणार आहे़ या मार्गाने जाणाऱ्या वाहनधारकांना एम़एस़ई़बी. पॉवर हाऊस - अंबड गाव - सिडको हॉस्पिटलपासून इतरत्र जाता येईल़
ओमसाई किचन कंपनी - कॉपरट्रॅक - अदिती इंडस्ट्रिज - फॉक्स कंपनी - प्रिंटेक्स इंजिनिअर्स - एलजय कंपनीपर्यंतचा रस्ता दोन्हीही बाजूने ये-जा करणाऱ्या सर्व प्रकारच्या वाहनांना वाहतुकीसाठी प्रवेश बंद असणार आहे़
देवळाली मतदारसंघाची मतमोजणी चिंचबन कॉर्नरजवळील महानगरपालिकेचे नवीन पंचवटी विभागीय कार्यालय इमारत येथे होणार आहे़ त्यामुळे मखमलाबाद नाका ते चिंचबन कॉर्नरपर्यंत दोन्ही बाजूने मार्ग वाहतूक पूर्णपणे बंद करण्यात आली असून, नागरिकांनी वाहतुकीसाठी खालील मार्गाचा वापर करावा़ मालेगाव स्टॅण्डकडून मखमलाबाद नाक्याकडे येणारी वाहतूक ही रामवाडीकडे न जाता सरळ जातील तसेच पेठफाटामार्गे इतरत्र जातील़
पेठफाट्याकडून येणारी वाहने ही रामवाडीकडे न जाता मालेगाव स्टॅण्डमार्गे इतरत्र जातील़ मखमलाबाद गावाकडून येणारी वाहने क्रांतीनगरकडे न जाता उजवीकडे वळून चोपडा लॉन्स तसेच डावीकडे वळून पेठरोडमार्गे इतरत्र जातील़ (प्रतिनिधी)