तंत्रशिक्षण प्रवेश प्रक्रियेत विद्यार्थ्यांना ई - स्क्रुटिनी पर्याय

नाशिक : तंत्रशिक्षण संचालनालयाने बारावीनंतरच्या थेट द्वितीय वर्ष अभियांत्रिकी पदविका आणि तंत्रज्ञान अभ्यासक्रमांच्या प्रवेश प्रक्रियेचे वेळापत्रक सोमवारी (दि. १२ ) जाहीर केले असून, त्यानुसार मंगळवार (दि. १३) पासून विद्यार्थ्यांच्या ऑनलाईन प्रवेश नोंदणी प्रक्रियेला सुरुवात झाली आहे. इच्छुकांना ४ ऑगस्टपर्यंत नोंदणीसाठी मुदत देण्यात आली आहे. कोविड - १९चा प्रादुर्भाव व सामाजिक अंतर राखण्याची आवश्यकता विचारात घेऊन तंत्रशिक्षण संचालनालयाने ई - स्क्रुटिनी व प्रत्यक्ष स्क्रुटिनीचा पर्याय उपलब्ध करून दिला आहे. विद्यार्थ्यांना त्यांच्या सोयीनुसार ऑनलाईन अर्ज भरणे व निश्चित करणे यासाठी स्क्रुटिनी पद्धत निवडता येणार आहे.

दहावीप्रमाणे बारावीच्या निकालाची वाट न पाहता, बारावीनंतरच्या थेट द्वितीय वर्ष अभियांत्रिकी पदविका अभ्यासक्रमाच्या प्रवेशप्रक्रियेला प्रारंभ झाला आहे. या प्रवेश प्रक्रियेसाठी दोन पर्याय तंत्रशिक्षण संचालनालयाकडून सुचविण्यात आले आहेत. यात विद्यार्थी ऑनलाईन नोंदणी करून ई - स्क्रुटिनी पध्दतीचा पर्याय निवडू शकतील. या पध्दतीमध्ये उमेदवार कोणत्याही ठिकाणावरून संगणक / स्मार्ट फोनद्वारे ऑनलाईन अर्ज भरू शकतील. तसेच विद्यार्थ्यांना अर्जाच्या पडताळणीसाठी व निश्चितीसाठी कोठेही प्रत्यक्ष जाण्याची आवश्यकता नाही. अर्ज व कागदपत्रे सुविधा केंद्रांवर (एफसीद्वारे) पडताळले जाणार आहेत. तसेच दुसऱ्या पर्यायात मोबाईल व संगणकावरून ऑनलाईन नोंदणी करून प्रत्यक्ष स्क्रुटिनी पध्दतीचा पर्याय विद्यार्थी निवडू शकतील. ज्या विद्यार्थ्यांकडे स्मार्टफोन अथवा संगणकाची सुविधा नाही, अशा विद्यार्थ्यांनी त्यांच्या जवळील सुविधा केंद्रावर जाऊन ऑनलाईन नोंदणी व सोयीस्कर वेळ ठरवण्यासाठी जावे. अशा प्रकारे ऑनलाईन नोंदणी झालेले विद्यार्थी पुढील प्रक्रियेसाठी सुविधा केंद्राची तारीख व वेळ ठरवून घेतील. विद्यार्थी ऑनलाईन अर्ज भरणे, स्कॅन करून आवश्यक

कागदपत्रे अपलोड करणे आदी प्रक्रिया सुविधा केंद्रावर स्वतः नि:शुल्कपणे करू शकतील.

---

प्रवेश प्रक्रियेचे वेळापत्रक

३१ जुलै ते ४ ऑगस्ट - ऑनलाईन नोंदणी करणे व कागदपत्र अपलोड करणे तसेच अर्जाची निश्चिती करणे

७ ऑगस्ट - तात्पुरती (प्रारुप) गुणवत्ता यादी जाहीर होणार

८ ते १० ऑगस्ट - तात्पुरत्या गुणवत्ता यादीविषयी हरकती व दुरुस्ती

१२ ऑगस्ट - अंतिम गुणवत्ता यादी जाहीर होणार

---

अंतिम यादीनंतर पुढील वेळापत्रक

प्रत्यक्ष स्क्रुटिनी पध्दत निवडणाऱ्या विद्यार्थ्यांनी कोविडसंदर्भातील मार्गदर्शक सूचनांचे काटेकोरपणे पालन करण्यात सूचना करण्यात आल्या आहेत. नियुक्त केलेल्या सुविधा केंद्रांवर सामाजिक अंतर राखणे तसेच त्या ठिकाणी इच्छुक उमेदवार व पालकांची गर्दी टाळणे आवश्यक आहे. तसेच कॅपच्या विविध फेऱ्यांकरिता पर्याय निवडणे, कॅप जागा वाटप, जागा स्वीकृती

करणे, उमेदवाराने वाटप केलेल्या संस्थांमध्ये उपस्थित राहाणे, प्रवेशाची अंतिम तारीख आदींबाबतचे पुढील वेळापत्रक अंतिम गुणवत्ता यादी जाहीर झाल्यानंतर घोषित केले जाणार आहे.