१२ आणि १५ रोजी सरपंच, उपसरपंचपदाची निवडणूक

नाशिक : जिल्ह्यात सार्वत्रिक निवडणूक झालेल्या ६१९ ग्रामपंचायतींमधील सरपंचपदाच्या निवडणुकीचा कार्यक्रम जाहिर झाला असून, येत्या १२ आणि १५ तारखेला सरपंचपदाचा फैसला होणार आहे. सिन्नर तालुक्यातील सरपंचपदाच्या आरक्षणाला न्यायालयाने स्थगिती दिल्याने सिन्नर तालुका वगळता उर्वरित तालुक्यांच्या निवडणुका दोन टप्प्यांत पार पडणार आहेत. याबाबतचे आदेश उपजिल्हाधिकारी नितीन गावंडे यांनी काढले आहेत. सरपंचपदाची निवडणूक असलेल्या ग्रामपंचायतींची संख्या मोठी असल्याने दोन टप्प्यांत निवडणूक घेतली जाणार आहे. यंदा सदस्यांमधून सरपंच निवडला जाणार असल्याने आरक्षणापासूनच मोर्चेबांधणीला सुरुवात झाली आहे, तर काही ग्रामपंचायतींचे चित्र स्पष्ट असल्याने केवळ औपचारिकता राहिली आहे. येत्या १२ आणि १५ तारखेला होणाऱ्या निवडणुकीनंतर त्यावर शिक्कामेार्तब होणार आहे.

गेल्या महिन्यात जिल्ह्यातील ६२१ ग्रामपंचायतींच्या निवडणुका पार पडल्या. देवळा तालुक्यातील उमराणे व येवला तालुक्यातील कातरणे ग्रामपंचायतीच्या निवडणुकीची संपूर्ण प्रक्रिया लिलाव प्रकरणामुळे निवडणूक आयोगाने रद्द ठरविली. उर्वरित ६१९ ग्रामपंचायतींमधील सरपंचपदाच्या निवडणुकीची प्रक्रिया पूर्ण केली जाणार आहे. यंदा सदस्यांमधून सरपंच निवडले जाणार असल्याने या निवडणुकीकडे सर्वांचे लक्ष लागून आहे. गेल्या आठवड्यात सरपंचपदासाठी जात प्रवर्गानिहाय आरक्षण जाहिर करण्यात आले होते, तर नुकतेच महिला सरपंचपदाचे आरक्षणदेखील जाहीर करण्यात आले होते.

निवडणुकीच्या दोन दिवसांत कोणत्या तारखेला निवडणूक घ्यावयाची याबाबतचा निर्णय तहसीलदार घेणार आहेत. याबाबत त्यांना नोडल अधिकाऱ्यांनीदेखील कळविले आहे. तहसीलदारांनी कळविलेल्या तारखेनुसार ग्रामंपाचयतनिहाय निवडणुकीचे आदेश निवडणूक निर्णय अधिकाऱ्यांना दिले जाणार आहेत. त्यानुसार सिन्नर तालुका वगळून नाशिक, त्र्यंबक, दिंडोरी, इगतपुरी, निफशड, सिन्नर, येवला, मालेगाव, नांदगाव, चांदवड, कळवण, बागलाण व देवळाया तालुक्यातील ग्रामपंचायतीच्या सरपंचदाची निवडणूक होणार आहे.

---इन्फो---

सिन्नर तालुका वगळून निवडणूक

सिन्नर तालुक्यातील मौजे दहिवडी ग्रुप ग्रामपंचायत येथील सरपंचपदाचे आरक्षण सर्वसाधारण गटासाठी निघाले. गतवर्षी याच गटासाठी आरक्षण काढण्यात आले होते. लोकसंख्येच्या प्रमाणात सरपंचपदाचे आरक्षण काढण्यात आले नसल्याचा आरेाप करीत एका सामाजिक कार्यकर्त्याने न्यायालयात धाव घेतल्याने न्यायालयाने येत्या दि. १६ तारखेपर्यंत मौजे दहिवडी ग्रुप ग्रामंपाचयतीची निवडणूक घेऊ नयेत असे आदेश दिले आहेत. त्यानुसार सिन्नर तालुका वगळून इतर ठिकाणी निवडणूक प्रक्रिया राबविली जाणार आहे.