ध्वजदिन निधी संकलनात भरीव योगदाने द्यावे

लोकमत न्यूज नेटवर्क

नाशिक : देशाची सीमा सुरक्षित रहावी यासाठी आपले सैनिकसीमेवर आपले कर्तव्य निभावत असतात. कर्तव्य पार पाडताना प्रसंगी आपल्या प्राणांचे बलिदानदेखील देतात. अशा सैनिकांप्रती कृतज्ञता म्हणून साजऱ्या होणाऱ्या सशस्त्र सेना ध्वजदिनाच्या निधी संकलनासाठी समाजातील सर्वच घटकांनी भरीव योगदान द्यावे, असे आवाहन जिल्हाधिकारी सूरज मांढरे यांनी सशस्त्र सेना ध्वजदिन निधी संकलन कार्यक्रमाच्या शुभारंभप्रसंगी केले आहे.

जिल्हाधिकारी कार्यालयात जिल्हाधिकारी सूरज मांढरे यांच्या हस्ते ध्वजदिन २०२० निधी संकलन कार्यक्रमाचा शुभारंभ करण्यात आला. सैनिकांप्रती आपली निष्ठा दाखविण्यासाठी ७ डिसेंबरला साजरा होणाऱ्या सशस्त्र सेना ध्वजदिन म्हणून साजरा केला जातो, त्या पार्श्वभूमीवर ते बोलत होते. यावेळी जिल्हा सैनिक कल्याण अधिकारी माजी लेफ्टनंट कमांडर ओंकार कापले, जिल्हा सैनिक कार्यालयातील कर्मचारी नवनाथ दाने, संजय थोरात, सुनील पाटील आदी उपस्थित होते. जिल्हाधिकारी मांढरे म्हणाले, १९४९ पासून प्रत्येक वर्षी ०७ डिसेंबर रोजी सशस्त्र सेना ध्वजदिन साजरा करण्यात येतो. जिल्हा सैनिक कल्याण कार्यालयामार्फत या दिवसापासून ध्वजदिन निधी संकलनास प्रारंभ करण्यात येत असतो. संकलित करण्यात येणाऱ्या निधीचा वापर धारातीर्थी पडलेल्या तसेच अपंगत्व आलेल्या सैनिक, युद्धविधवा, माजी सैनिक व त्यांच्या कुटुंबाच्या कल्याणासाठी करण्यात येतो. या निधीच्या माध्यमातून आपली देशाप्रति असलेली भावना व आदर व्यक्त करण्यासाठीचे साधन म्हणून ध्वजदिन निधी संकलनात सर्वांनी योगदान देणे आवश्यक आहे. त्यासाठी भारतीय प्रशासकीय सेवेतील अधिकारी यांनी रुपये पाच हजार, वर्ग १ अधिकारी यांनी तीन हजार व इतर अधिकारी कर्मचारी यांनी त्यांच्या क्षमतेनुसार योगदान द्यावे, असे जिल्हाधिकारी मांढरे यांनी यावेळी सांगितले.

इन्फो

निधी संकलनास प्रारंभ

जिल्हाधिकारी मांढरे यांनी सशस्त्र सेना ध्वजदिनानिमित्त रुपये पाच हजारांचा निधी देऊन ध्वजदिन निधी संकलनास प्रारंभ केला. जिल्हा सैनिक कल्याण कार्यालयामार्फत जिल्हाधिकारी मांढरे यांना तिन्ही दलांचे प्रतीक असलेला ध्वज आणि स्मृतिचिन्ह देण्यात आले.