आत्महत्येस प्रवृत्त केल्याप्रकरणी चौघांविरुध्द गुन्हा

याबाबत पोलिसांनी दिलेली माहिती अशी की, गेल्या शनिवार (दि. २६) अंबड परिसरातील रामकृष्णनगर भागात राहणारा तरुण नरसीराम समनाजी चौधरी (३०) याने राहत्या घराच्या छताला नायलॉनच्या दोरीने गळफास लावून आत्महत्या केली होती. आत्महत्या करण्यापूर्वी चौधरी यांनी चिठ्ठी लिहिली होती. या चिठ्ठीच्या आधारे पोलिसांनी चौधरी यांना आत्महत्येस कारणीभूत ठरलेले चौघे संशयित आशिष शहा, हरीश शहा (दोघे रा. मुंबई), शिरीष (पूर्ण नाव माहीत नाही) व मोहन जोशी (रा. नाशिक) यांच्या विरोधात आत्महत्येस प्रवृत्त केल्याप्रकरणी गुन्हा दाखल केला आहे. चौधरी यांनी आत्महत्या करण्यापूर्वी लिहिलेली चिठ्ठी पोलिसांना आढळून आली होती. यामध्ये वरील संशयित चौघांनी पैशाच्या देवाणघेवाणीवरून मानसिक त्रास देत जीवे ठार मारण्याची धमकी दिल्याचा मजकूर चिठ्ठीत लिहिला असल्याचे पोलिसांनी सांगितले. प्रारंभी अंबड पोलीस ठाण्यात या घटनेप्रकरणी अकस्मात मृत्यूची नोंद करण्यात आली होती. यानंतर चिठ्ठीतील मजकुराची शहानिशा करत पोलिसांनी त्यामध्ये उल्लेख असलेल्या चौघा संशयित व्यक्तींविरुध्द गुन्हा नोंदविला आहे. अधिक तपास पोलीस निरीक्षक श्रीकांत निंबाळकर करीत आहेत.