दारणात चारशे एमसीएफटी साठा पडून, तरी कपातीचे सकंट

नाशिक : शहरासाठी यंदा परिसरातील तीन धरणांमधून मुबलक पाणी आरक्षण मंजूर करण्यात आले असले तरी दारणा धरणातून गेल्या चार महिन्यांपासून पाणी उचलणे राजकीय दबावामुळे बंद असून, त्याचा भार गंगापूर धरणावर आला आहे. अशावेळीक आरक्षणापेक्षा सुमारे दाेनशे दशलक्ष घनफूट पाणी या धरणातून उचलावे लागणार असल्याने तातडीने पाणीकपात करण्याची शिफारस पाणीपुरवठा विभागाने केली आहे. त्यामुळे लवकरच नाशिककरांना पाणीकपातीला सामोरे जावे लागण्याची शक्यता आहे.

नाशिक शहराला गंगापूर, दारणा आणि मुकणे धरणातून पाणीपुरवठा होतो. गेल्यावर्षी जिल्हाधिकाऱ्यांकडे झालेल्या पाणी आरक्षणाच्या बैठकीसाठी नाशिक महापालिकेच्या मागणीनुसार प्रस्ताव मंजूर करण्यात आला आहे. त्यानुसार गंगापूर धरणातून ३८०० दशलक्ष घनफूट, दारणामधून ४०० तर मुकणे धरणातून १३०० दशलक्ष घनफूट पाणी आरक्षित देण्यात आले आहे. मात्र, गेल्यावर्षी चेहेडी धरणातून पाणीपुरवठा करताना अडचणी निर्माण झाल्या. भगूर, देवळाली कॅम्प परिसरातील मलजल थेट बंधाऱ्यापर्यंत पोहोचत असल्याने दूषित पाण्याचा पुरवठा सुरू झाला आणि नाशिकरोड विभागातील नगरसेवकांनी त्यास विरोध केला आणि तेथून उपसा बंद केला. गेल्या नोव्हेंबर महिन्यापासून चेहेडी बंधाऱ्यातून नाशिकरोड विभागाला दिले जाणारे पाणी बंद करण्यात आले असून त्याऐवजी गंगापूर धरणातून बारा बंगला आणि तेथून गांधीनगर जलकुंभ येथून त्या विभागाला पाणीपुरवठा करण्यात येत आहे. त्यामुळे दारणा धरणात ४०० दशलक्ष घनफूट पाणीसाठा नाशिक महापालिकेसाठी आरक्षित असला तरी दारणा धरणातून पाणी उचलले गेले नाही. या धरणात महापालिकेने जेमतेम १६ दशलक्ष घनफूट पाणी उचलले आहे, तर दुसरीकडे गंगापूर धरणातून पाणी उपसा सुरू असून, या धरणात ३८०० दशलक्ष घनफूट पाणी आरक्षण असले तरी आणखी अतिरिक्त दाेनशे दशलक्ष घनफूट पाणीसाठा आरक्षणाच्या मुदतीत म्हणजे ३१ जुलैपर्यंत लागणार आहे.

इन्फो...

सध्या पावसाचा भरवसा नसल्याने महापालिकेला दरवेळी काळजी घ्यावी लागते. यंदा केवळ नाशिकरोड विभागातील नगरसेवकांचा राजकीय दबाब म्हणून नाशिक महापालिकेला पाणी उचलता आलेले नाही. त्याचा फटका आता संपूर्ण नाशिककरांना बसला आहे. त्यामुळे एक वेळ पाणीपुरवठा किंवा पाणी पुरवठ्याच्या वेळेत कपात करावी, अशी शिफारस पाणीपुरवठा विभागाने आयुक्त कैलास जाधव यांच्याकडे केली आहे. आता त्यांच्या निर्णयाकडे लक्ष लागून आहे.

इन्फो...

नाशिकरोड विभागासाठी चेहेडी बंधारा येथून पाणी उपसा केला जातो. तेथील

मलजलाची समस्या सोडवण्यासाठी प्रयत्न सुरू असले तरी महापालिकेने

अशाप्रकारचे मलजल येणाऱ्या नाल्याच्या वरील बाजूने पाइनलाइन टाकून

धरणातील पाणी उचलण्याचे ठरवले आहे. त्यासाठी शासनाकडून निधी मिळावा यासाठी प्रस्ताव पाठवण्यात आला आहे. मात्र तो मंजूर होत नाही आणि दुसरीकडे बंधाऱ्यातील पाणीच उचलू देत नसल्याने अखेरीस गंगापूर धरणावर ताण आला आहे.

इन्फो..

ग्राफसाठी आकडेवारी..

गंगापूर धरण आरक्षण - ३८०० दशलक्ष घनफूट, शिल्लक आरक्षण १०४८ दशलक्ष घनफूट

मुकणे धरण आरक्षण- १३०० दशलक्ष घनफूट, शिल्लक आरक्षण ४३३ दशलक्ष घनफूट

दारणा धरण आरक्षण - ४०० दशलक्ष घनफूट, शिल्लक आरक्षण - ३८३ दशलक्ष घनफूट