नाशिकच्या जिल्हा रूग्णालयात मोफत केमोथेरपी

राष्ट्रीय कर्करोग नोंदणी कार्यक्रमानुसार देशात वर्षभरात समारे ११ लाख कर्करुग्ण आढळून येतात. देशात जुने आणि नवे मिळून सुमारे २८ लाख कर्करुग्णांची संख्या आहे. त्यापैकी पाच लाख मृत्यू दरवर्षी कर्करोगाने होतात. महाराष्ट्रातील कर्करोगाचे प्रमाण कमी करण्याबाबत राज्य शासनातर्फे उपाययोजना केल्या जातात.

ठळक मुद्देजून महिन्यात शुभारंभ : औषथेही मोफत देणारजुनपासून युनिट जिल्हा रुग्णालयात सुरू होणार

नाशिक: कर्करोगावरील उपचारामध्ये महत्वाची भमिका असणाऱ्या केमोथेरीपीची मोफत सुविधा आता नाशिक जिल्हा रुग्णालयात उपलब्ध करून देण्यात येणार असून, साधारणता जुन महिन्यापासून या योजनेचा पहिला टप्पा सुरू होणार आहे. नाशिकसह नागपूर, गडचिरोली, पुणे, अमरावती, जळगाव, वर्धा, सातारा, भंडारा आणि अकोला या १० जिल्ह्यांमध्येही ही सुविधा उपलब्ध करून देण्यात येणार आहे. पुढील महिन्यापासून जिल्हा रुग्णालयातील फिजीशिअन आणि नर्स यांना मुंबईतील टाटा रुग्णालयात याबाबत प्रशिक्षण देण्यात येणार आहे.
राष्ट्रीय कर्करोग नोंदणी कार्यक्रमानुसार देशात वर्षभरात समारे ११ लाख कर्करुग्ण आढळून येतात. देशात जुने आणि नवे मिळून सुमारे २८ लाख कर्करुग्णांची संख्या आहे. त्यापैकी पाच लाख मृत्यू दरवर्षी कर्करोगाने होतात. महाराष्ट्रातील कर्करोगाचे प्रमाण कमी करण्याबाबत राज्य शासनातर्फे उपाययोजना केल्या जातात. उपचारासोबतच प्रतिबंधात्मक आणि जाणीवजागृतीपर मोहिम हाती घेतली जाते. गेल्यावर्षी डिसेंबरमध्ये संपूर्ण महिनाभर मौखिक आरोग्य तपासणी मोहिम राबविण्यात आली. दिवसेंदिवस कर्करोगाचा वाढता प्रसार पाहता त्याच्या उपचारासाठी आरोग्य विभाग आणि टाटा रुग्णालयाच्या माध्यमातून प्रयत्न केले जात आहेत.
कर्करोगाच्या उपचारात केमोथेरीपी महत्वाची भूमिका बजावते. त्यासाठी मुंबईतील टाटा रुग्णालयातर्फे आवश्यकतेनुसार समारे सहा आठवड्यांचा केमोथेरीपी कोर्स रुग्णाला दिला जातो. यासाठी रुग्णाला दर आठवड्याला मुंबईत जावे लागते. त्यांना प्रवासाचा होणारा ताण, आर्थिक ताण ह्या सर्व बाबी लक्षात घेऊन आता मोफत किमोथेरीपीची सुविधा जिल्हा रुग्णालयांमध्ये उपलब्ध करून देण्याचा निर्णय आरोग्यमंत्री डॉ. दीपक सावंत यांनी घेतला आहे. यासुविधमुळे कर्करुग्णांना स्थानिकस्तरावरच उपचार घेता येणे शक्य होणार आहे. या सुविधेच्या पहिल्या टप्प्यात १० जिल्ह्यांचा समावेश करण्यात आला आहे. किमोथेरपी औषध देण्याचे प्रशिक्षण प्रत्येक जिल्हा रुग्णालयातील एक फिजीशिअन आणि स्टाफ नर्स यांना देण्यात येणार आहे. टाटा रुग्णालयाच्या सहकायार्ने मेडीकल आॅन्कोलॉजी विभागात तीन आठवड्यांचे हे प्रशिक्षण दिले जाणार असून मे महिन्यापासून पहिल्या तुकडीचे प्रशिक्षण सुरू होणार आहे. त्यासाठी जिल्हा रुग्णालयांना फिजीशिअन आणि नर्स यांची नावे कळविण्यास सांगितली आहेत.