आठ वर्षांपासून फरार संशयिताला अटक

दरोड्याच्या उद्देशाने दोघांना भर रस्त्यात अडवून त्यांना जबर मारहाण करत सोन्याचे ब्रेसलेट ओढून फरार झालेल्या टोळीतील एक संशयितास गुन्हे शाखा युनिट-२च्या पथकाने अटक केली आहे.

नाशिक : दरोड्याच्या उद्देशाने दोघांना भर रस्त्यात अडवून त्यांना जबर मारहाण करत सोन्याचे ब्रेसलेट ओढून फरार झालेल्या टोळीतील एक संशयितास गुन्हे शाखा युनिट-२च्या पथकाने अटक केली आहे. गेल्या आठ वर्षांपासून या गुन्ह्यात पोलिसांना हवा असलेला फकिरा दत्ता सावंत (२७, रा. इंदिरानगर) हा पाथर्डी रस्त्यावरील चायनिज चौपाटी भागात आला असता पथकाने सापळा रचून त्यास बेड्या ठोकल्या. २७ नोव्हेंबर २०१४ रोजी मुंबईनाका येथे फिर्यादी वृत्तवाहिनीचे छायाचित्रकार किरण कटारे, हेमंत बागुल या युवकांना बळजबरीने मारहाण करत संशयित फकिरा सावंत व त्याच्या पाच ते सहा साथीदारांनी मिळून लुटले होते. याप्रकरणी सरकारवाडा पोलीस ठाण्यात दरोडा, मारहाणीचा गुन्हा दाखल करण्यात आला. तेव्हापासून फकिरा फरार झाला होता. पोलिसांना मिळालेल्या गोपनीय माहितीच्या आधारे पथकाने सापळा रचून शिताफीने त्यास ताब्यात घेतले. त्यास पुढील तपासाकरिता सरकारवाडा पोलिसांच्या हवाली करण्यात आले आहे.