भरधाव कारच्या धडकेत आजोबा-नातू ठार

डीजीपीनगर रायन इंटरनॅशनल शाळेसमोर राहणारे ॲड. मिलिंद भगवान गायकवाड यांनी दिलेल्या फिर्यादीनुसार, मंगळवारी सकाळी साडेदहा वाजेच्या सुमारास त्यांचे वडील भगवान गायकवाड (६७) आणि भाचा अरीण (३) हे स्कुटी या दुचाकीने (एमएच १५ बीपी ८२९८) टागोरनगर येथील दुकानात वस्तू खरेदी करण्यासाठी गेले होते. येथून घरी परतत असताना टागोरनगर येथील इच्छापूर्ती साईबाबा मंदिरासमोर एका आय टेन कारने (एमएच०२ बीवाय ४४१५) त्यांच्या दुचाकीला जोरदार धडक दिली. या धडकेत अरीण या बालकाच्या अंगावरून कारचे चाक गेल्याने त्याचा जागीच मृत्यू झाला. तसेच भगवान गायकवाड हे गंभीर जखमी झाल्याने त्यांना तातडीने खासगी रुग्णालयात दाखल करण्यात आले. उपचारादरम्यान त्यांचाही मृत्यू झाला.

या कारचालकाने दुसऱ्या एका दुचाकीलाही (एमएच१५ सीए १४४२) धडक दिली. यामुळे या दुचाकीचा चालकही बालंबाल बचावला. तो किरकोळ स्वरुपात जखमी झाल्याचे पोलिसांनी सांगितले. दोन दुचाकींना धडक देऊनही कार थांबली नाही तर रस्त्यालगतच्या एका दुकानासह संरक्षक भिंतीवर जाऊन आदळली. या भीषण अपघातानंतर कारमधील तिघेजण मद्यधुंद अवस्थेत बाहेर आल्याचे प्रत्यक्षदर्शिनी सांगितले. अपघातात आजोबा व नातवाचे निधन झाल्याने परिसरात हळहळ व्यक्त केली जात आहे. याप्रकरणी कारचालक फिरोज नासीर खान (३६,रा. मोटवानी रोड नाशिकरोड) याच्याविरुद्ध उपनगर पोलीस ठाण्यात गुन्हा दाखल करण्यात आला असून, त्याला अटक करण्यात आली आहे.

---

===Photopath===

300621\30nsk_25_30062021_13.jpg~300621\30nsk_26_30062021_13.jpg

===Caption===

आजोबा भगवान, नातू अरीन~आजोबा भगवान, नातू अरीन