पोलिसांना खबर दिल्याच्या संशयावरून कोयत्याने वार

पंचवटी : पोलिसांना खबर देण्याच्या शंशयातून वाद घालत कुरापत काढून दोघा जणांनी दोन सख्ख्या भावांना बेदम मारहाण करून हातावर कोयत्याने वार केल्याची घटना अमृतधाम अयोध्यानगर येथे घडली आहे. या घटनेत युवकाच्या पंजावर गंभीर दुखापत झाली असून, पोलिसांनी वार करणाऱ्या दोघांना अटक केली आहे.

पोलिसांनी दिलेल्या माहितीनुसार, अयोध्यानगर येथील सूर्यपुत्र सोसायटी येथे शुक्रवारी (दि.३०) सायंकाळच्या सुमारास ही घटना घडली. याप्रकरणी मनोज नेमीचंद छाजेड यांनी फिर्याद दिली आहे. त्यानुसार सागर ऊर्फ काळू रमेश गायकवाड व अंकुश रमेश गायकवाड या सख्ख्या भावंडांवर पंचवटी पोलीस ठाण्यात गुन्हा दाखल करण्यात आला आहे. गेल्या शुक्रवारी सायंकाळी संशयित आरोपी गायकवाड बंधूंनी मनोज छाजेड व त्याच्या भावाला शिवीगाळ करत बेदम मारहाण केली. त्यानंतर संशयितांनी धारदार कोयत्याने मनोजच्या उजव्या हातावर वार केला. त्यात त्याच्या हाताच्या चार नसा कापल्या गेल्याने मनोज गंभीर जखमी झाला आहे. मारहाण करणारे गायकवाड बंधू हे सराईत गुन्हेगार असून, त्यांच्याविरुद्ध पंचवटी आणि भद्रकाली पोलीस ठाण्यांत गुन्हे दाखल असल्याची माहिती पोलिसांनी दिली. सदर घटनेनंतर पोलिसांनी दोघांनाही अटक केली असून, याबाबत पंचवटी वरिष्ठ पोलीस निरीक्षक अशोक भगत यांच्या मार्गदर्शनाखाली तपास सुरू आहे.