4 जूनला किती वेळ राहिलाय, थोडा धीर...; पृथ्वीराज चव्हाणांच्या अंदाजावर भुजबळांचा सल्ला

काल मुंबईत घडलेली घटना ही दुर्दैवी होती. एअर पोर्टकडे जाताना असे अनेक होर्डींग दिसतात, हे होर्डिंग समांतर हवे होते परंतु ते रस्त्यावर आहेत. - छगन भुजबळ

पृथ्वीराज चव्हाण यांनी जाहीर केलेली आकडेवारी ही ज्योतिषी सारखे आहे. 4 जूनला किती वेळ राहिला आहे, थोडा धीर धरायला काय हरकत आहे, परिणाम व्हावा म्हणून अशी वक्तव्ये होत असतील, असे भुजबळ यांनी स्पष्ट केले. तसेच संजय राऊतांनी केलेल्या पैशांच्या बॅगांवर आपल्याला काही माहिती नाही, असे भुजबळ म्हणाले. तसेच मोदींच्या सभेचा आढावा घेण्याची आपलीही तयारी असल्याचे भुजबळ म्हणाले. 

काल मुंबईत घडलेली घटना ही दुर्दैवी होती. एअर पोर्टकडे जाताना असे अनेक होर्डींग दिसतात, हे होर्डिंग समांतर हवे होते परंतु ते रस्त्यावर आहेत. त्यांचे वजन सुद्धा भरपूर आहे. सगळे अनधिकृत आहेत. या घटनेची चौकशी झाली पाहिजे. बेकायदेशीर आहे मग वेळ कशाला काढता? असा सवाल करत भुजबळ यांनी सगळ्याच संस्थांनी याची काळजी घेतली पाहिजे, असे मत व्यक्त केले. 

रस्त्यावरून जाणाऱ्या लोकांचा गुन्हा काय? शासन 5 लाख देईल, म्हणजे संपले का? असा सवाल करत भुजबळ यांनी  जितका आकार असायला हवा होता त्या पेक्षा खूप मोठा आकार त्या होर्डिंगचा होता, असा आरोप केला. 

तसेच होर्डिंग कंपनीचा मालक भावेश भिडे आणि मातोश्रीचा संबंध असल्याचा आरोप भाजपा आमदार, नेत्यांनी केला होता. यावर भुजबळांनी उद्धव ठाकरेंचा काय संबंध? असा थेट सवाल करत भाजप नेत्यांचे आरोप खोडून काढले आहेत. सरकार आमचे आहे. महानगर पालिका सुद्धा सध्या आमचीच आहे. असे अनेक लोक असतात, व्यापारी सगळ्यांकडे येतात. मिठाई घेऊन येतात आणि फोटो काढतात, यात राजकारण आणण्याचा प्रयत्न करू नका असा सल्लाही भुजबळ यांनी दिला आहे.