बारावीचा निकाल पुढील आठवड्यात

नाशिक : बारावीच्या परीक्षांचा निकाल पुढील आठवड्यात आॅनलाइन जाहीर होण्याची शक्यता आहे. त्याबाबतची अधिकृत घोषणा बोर्डातर्फे सोमवारपर्यंत करण्यात येऊ शकते.

लोकमत न्यूज नेटवर्क
नाशिक : महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी, मार्च २०१७ मध्ये घेण्यात आलेल्या बारावीच्या परीक्षांचा निकाल पुढील आठवड्यात, तर दहावीचा निकाल जूनच्या पहिल्या आठवड्यात आॅनलाइन जाहीर होण्याची शक्यता आहे. त्याबाबतची अधिकृत घोषणा बोर्डातर्फे सोमवारपर्यंत करण्यात येऊ शकते. निकालाबाबत सोशल मीडियावरील मेसेजवर विद्यार्थी, पालकांनी विश्वास ठेवू नये, असे आवाहन बोर्डाच्या अधिकाऱ्यांनी केले आहे.
महाराष्ट्र राज्य माध्यमिक व उच्च माध्यमिक शिक्षण मंडळातील सूत्रांनी ही माहिती दिली. दहावी-बारावीच्या परीक्षांच्या निकालाच्या तारखांबाबत सोशल मीडियावर वेगवेगळे मेसेज फिरत आहेत. यात बारावीचा निकाल २८ मे रोजी; तर दहावीचा निकाल ३० मे रोजी जाहीर होणार आहे, असे म्हटले आहे. तर काही मेसेजेसमध्ये अन्य तारखांचाही समावेश होता. त्यामुळे विद्यार्थी व पालकांमध्ये संभ्रम निर्माण होत होता. मागील वर्षी बारावीचा निकाल २५ मे रोजी जाहीर झाला होता. त्या वेळचा मेसेज काही व्यक्तींनी गेल्या काही दिवसांत व्हायरल केला होता. त्यामुळेही विद्यार्थी संभ्रमात होते. या पार्श्वभूमीवर मंडळाच्या अधिकाऱ्यांशी संपर्क साधला असता सोशल मीडियावर फिरणाऱ्या निकालाच्या तारखा अधिकृत नाहीत. मंडळाने अजून निकालाची तारीख जाहीर केलेली नाही. त्यामुळे विद्यार्थी आणि पालकांनी या तारखांवर विश्वास ठेवू नये, असे मंडळातील सूत्रांनी स्पष्ट केले. बारावीचा निकाल तयार करण्याचे काम सध्या अंतिम टप्प्यात आहे. येत्या दोन दिवसांत बैठक घेऊन आॅनलाइन निकालाची तारीख जाहीर केली जाणार आहे.