मुस्लिम कब्रस्तानांमध्येही जागा पडतेय अपुरी...!

------

नाशिक : शहरामध्ये अमरधामपाठोपाठ आता मुस्लिम कबरस्तानांमध्येसुद्धा दफनविधीसाठी जागा अपुरी पडू लागली आहे. आठवडाभरापासून कोरोनामुळे मुस्लिम समुदायातील मृत्यूचे प्रमाण वाढले आहे. दिवसाला कमीत कमी पाच तर जास्तीत जास्त दहा कबरी एका कबरस्तानमध्ये खोदाव्या लागत असल्याचे कबर खोदणाऱ्या मजुरांकडून सांगितले जात आहे. गेल्या पंधरवड्यात सुमारे ६८ लोक मृत्युमुखी पडले आहेत. त्यापैकी किमान ४५ ते ५० लोक हे कोरोनाचे बळी ठरल्याचे धक्कादायक चित्र आहे.

शहरात मुस्लिम समाजाच्या ज्या जुन्या पारंपरिक दफनभूमी (कबरस्तान) आहेत, त्यांची क्षमता आता पूर्णपणे संपुष्टात आली आहे. नव्याने कबर खोदायची तर नेमकी कोठे किंवा सर्वांत जुनी कबर कोणती असेल याचा संपूर्ण कब्रस्तानमध्ये शोध घ्यावा लागतो. मृतदेहांच्या दफनविधीसाठी जागा अपुरी पडू लागल्याने दफनविधीलाही विलंब होत आहे. महापालिका प्रशासनाने त्वरित उपाययोजना करून वडाळा गावात मुस्लिम कब्रस्तानसाठी आरक्षित असलेली जागा ताब्यात घेत तेथे दफनविधी सुरू करण्यास शहर ए खतीब हाफिज हिसामुद्दीन अशरफी यांच्या अध्यक्षतेखाली असलेल्या सुन्नी मरकजी सरत समितीला परवानगी द्यावी, अशी मागणी समुदायाकडून जोर धरू लागली आहे. कारण जे पारंपरिक कब्रस्तान आहेत, ते खासगी विश्वस्त संस्थेच्या अखत्यारीतील आहे. मनपाने आतापर्यंत शहारात मुस्लिम समुदायाला दफनविधीसाठी जागा उपलब्ध करून दिलेली नाही. काही दिवसांपूर्वी महापौर सतीश कुलकर्णी यांनी वडाळा गावातील आरक्षित जागा मनपाला हस्तांतरण करण्यासाठी ६० कोटी रुपयांची तरतूद काही महिन्यांपूर्वी केली आहे. त्यानुसार कोरोनाचे संकट लक्षात घेता तातडीने मनपा प्रशासनाने हा प्रश्न मार्गी लावून मुस्लिम समुदायाला दिलासा देण्याची मागणी खतीब ए शहर हिसामुद्दीन अशरफी यांच्यासह प्रमुख धर्मगुरू, उलेमा आणि विविध धार्मिक, सामाजिक संघटनांनी केली आहे.

-------

इन्फो

दररोज दहापेक्षा जास्त मृत्यू

मुस्लिमबहुल भाग असलेल्या वडाळा गाव, जुने नाशिक, पखाल रोड, आदी भागांत दररोज पाचपेक्षा जास्त मृत्यू होऊ लागले आहेत. मंगळवारी केवळ जहांगीर कब्रस्तानमध्ये संध्याकाळपर्यंत आठ ते दहा कबरी खोदण्यात आल्याचे कब्रस्तान सेवक फिरोज शेख यांनी सांगितले. पंधरवड्यात सुमारे ७० मृतदेहांचा शहरातील जुन्या नाशकातील जहांगीर, रसुलबाग, वडाळ्यातील गौसिया आणि आडगावयेथील कब्रस्तानांमध्ये दफनविधी करण्यात आल्याचे मृतांचा अखेरचा प्रवास सुखकर करण्यासाठी झटणारे सामजिक कार्यकर्ते रिजवान खान यांनी सांगितले. आतापर्यंत अंदाजे ४५ पेक्षा अधिक लोकांचा आठवड्यात कोरोनाने मृत्यू झाल्याचे खान म्हणाले.

----इन्फो---

अत्यावश्यक साधनांची वानवा

मनपाकडून मूलभुत साधनांचा पुरवठा होत नसल्याने जे लोक मृतांच्या अखेरचा प्रवास सुखकर करण्यासाठी अहोरात्र झटत आहे त्यांचाही जीव धोक्यात सापडला आहे. कुठल्याही कब्रस्तानमध्ये संबंधितांना सोडियम हायपोक्लाराईड, हातमोजे, मास्क, सॅनिटायझर, पीपीई किट वगैरे मनपाकडून यावर्षी उपलब्ध करून दिले जात नसल्याने संताप व्यक्त होत आहे. मृत्यूची नोंद करण्यासाठी लागणारा नमुना अर्जाचाही तुटवडा भासत असून झेरॉक्स दुकाने बंद असल्याने त्या नमुना अर्जाच्या सत्यप्रती मिळविणेही अवघड झाले आहे. त्याचा परिणाम थेट नोंदींवर होताना दिसत आहे.