भुजबळ निवडून यावेत म्हणून प्रयत्न करणार-कल्याणराव पाटील

भुजबळ निवडून यावेत म्हणून प्रयत्न करणार-कल्याणराव पाटील

 

लासलगाव : परिसरातील ४२ गावांच्या विकासाच्या मुद्द्यावर आपण कोणतीही तडजोड न करता बाळासाहेब ठाकरे यांचा सच्चा व स्वाभिमानी शिवसैनिक म्हणून शिवसेना न सोडता येत्या विधानसभा निवडणुकीत विद्यमान आमदार छगन भुजबळ निवडून यावेत म्हणून प्रयत्न करणार असल्याचे माजी आमदार कल्याणराव पाटील यांनी शनिवारी दुपारी लासलगावी झालेल्या पत्रकार परिषदेत जाहीर केले.
शिवसेनेने येवला विधानसभा मतदारसंघात उमेदवारी नाकारल्याने माजी आमदार कल्याणराव पाटील नाराज असून, शिवसेना नेत्यांनी त्यांची समजूत काढण्याचा प्रयत्न केला. तेव्हा पाटील यांनी आपण पुढील राजकीय भूमिका ११ आॅक्टोबर रोजी जाहीर करणार असल्याचे जाहीर केले होते. त्यामुळे येवला तालुक्याचे लक्ष त्यांच्या भूमिकेकडे लागले होते. ४२ गावांतील निष्ठावंतांच्या बैठकीत चर्चा करून आपण केवळ विकासाच्या मुद्द्यावर हा निर्णय घेतल्याचे पाटील यांनी स्पस्ट केले. मी सुरुवातीपासून शिवसेनेत आहे. कोणत्याही इतर पक्षात प्रवेश करणार नाही. १० वर्षात भुजबळांशी कोणतीही तडजोड केली नाही, असा खुलासाही त्यांनी केला. भुजबळ यांच्या व्यासपीठावर न बसता प्रेक्षकांमधून जाहीर सभेतून आपली भूमिका लोकांसमोर मांडणार असून, कोणतीही तडजोड न करता हा निर्णय जाहीर करीत असल्याचे ते म्हणाले. (वार्ताहर)