खडकजांबला पादचारी जागीच ठार

मुंबई-आग्रारोडवरील खडकजांब येथील सगुणा कंपनीच्या समोर ट्रक उभी करून क्लिनर नजीर इब्राहिम शेख (४५, रा. मदिना मशीदजवळ, सिल्लोड, जि. औरंगाबाद) हे जेवणाचे पार्सल आणण्यासाठी महामार्ग ओलांडत असताना स्कॉर्पिओने (क्र. एमएच १५ सीटी ३८८३) धडक दिली. यात शेख यांचा जागीच मृत्यू झाला. मंगरूळ सोमा कंपनीच्या रुग्णवाहिकेतून त्यांचा मृतदेह चांदवड उपजिल्हा रुग्णालयात आणला. याबाबत वडनेरभैरव पोलीस स्टेशनला अपघाताचा गुन्हा दाखल झाला असून, अधिक तपास सहायक पोलीस निरीक्षक गणेश गुरव, उपनिरीक्षक गवारे, गांगुर्डे, घुमरे करीत आहेत.

---------------------------------------------------------------------------

चांदवडला पावसाची जोरदार हजेरी

चांदवड - शहर व परिसरात बुधवारी दुपारी दोन वाजेच्या सुमारास पावसाने जोरदार हजेरी लावली. अचानक आलेल्या पावसाने सर्वाची एकच धावपळ उडाली. शहरात या पावसाने हवेत काहीसा गारवा निर्माण झाला असला तरी बाजार समितीत कांदा विक्रीसाठी आलेल्या शेतकऱ्यांची धावपळ उडाली. बऱ्याच शेतकऱ्यांनी कांदा शेतीमाल झाकण्यासाठी ताडपत्री सारखी व्यवस्था न केल्याने त्यांचा कांदा भिजला होता. अचानक पाऊस झाल्याने वीज पुरवठा सातत्याने खंडीत होत होता.