लसीसाठी मोठी सुई ; वेस्टेजमुळे पळता भुई !

नाशिक : कोरोना लसीकरणासाठी केंद्र शासनाकडून एडी सिरिंजचा पुरवठा कमी झाल्याने राज्यात तुटवडा निर्माण झाला आहे. बालकांच्या लसीकरणासाठी २ सीसी सिरिंज वापरण्यात येत असल्याने लसीचे वेस्टेज वाढत असल्याचे दिसून येत आहे. एडी सुईचा तुटवडा जाणवत असल्याने आरोग्य विभागासमोर नवीन अडचणी निर्माण झाल्या आहेत.

जिल्ह्यात मागील काही आठवड्यांपासून कोरोना लसीकरणाला गती देण्यात आली आहे. राज्यस्तरावरून लसीचा मुबलक पुरवठा होत असल्याने लाभार्थ्यांचा आकडा वाढला आहे; परंतु हे लसीकरण करण्यासाठी एडी सुईचा वापर केला जात असे. ही सुई केंद्र शासनाने दिली आहे; परंतु सध्या या सुईचा प्रचंड तुटवडा आहे. त्यामुळे लसीकरणासाठी साधारण नियमित वापरली जाणारी २ सीसीची सुई वापरली जात आहे. एकूणात लसींचा तुटवडा असल्याने सध्या तरी त्या पुरत आहेत; मात्र मोठ्या प्रमाणात लस उपलब्ध झाल्यानंतर त्यांचा हमखास तुटवडा जाणवत आहे.

काय आहे एडी, २ सीसी सिरिंज

एडी सिरिंज म्हणजे ॲटो डिसेबल. ०.५ मि.ली.ची ही सुई एकदा वापरली की, पुन्हा वापरता येत नाही. ही सुई आपोपाप लॉक होते. या सुईतून लस वेस्टेज होत नाही. तर २ सीसी ही सुई नियमितच्या इंजेक्शनची असते. त्यामुळे डोस वाया जातो. ती डिस्पोजेबल आहे.

दररोज २५ हजार सुईंची गरज

जिल्ह्यात दररोज सरासरी किमान २५ ते कमाल ५० हजारांपर्यंत लसीकरण होत आहे. त्यामुळे किमान २५ ते ३० हजार सुईंची आवश्यकता लागत आहे. अशा परिस्थितीत शासनाकडून त्या लवकरात लवकर आरोग्य विभागाकडे आणि तिथून जिल्ह्यातील संबंधित यंत्रणेकडे त्या सुयांचा पुरवठा होणे अत्यावश्यक आहे.

एडी सुईचा तुटवडा असल्याने स्थानिक पातळीवर २ सीसी सुईची खरेदी करण्याची वेळ जिल्हा आरोग्य विभागावर आली आहे. त्यामुळे याबाबत लवकरात लवकर निर्णय घेतला जाणार आहे.