मास्क हैं जरुरी, इसे समजो ना मजबुरी; २० हजार नाशिककरांनी दिला मास्क वापराला फाटा

नागरिकांनी गर्दीच्या ठिकाणी विशेषत: सार्वजनिक ठिकाणी वावरताना मास्क अवश्य लावावा आणि 'सोशल डिस्टन्स'बाबत सतर्क रहावे, असे आवाहन पोलीस आयुक्त दीपक पाण्डेय यांनी केले आहे.

ठळक मुद्देकोरोनाची भीती हटली, पण संकट कायम'सोशल डिस्टन्स'बाबत सतर्क रहावे

नाशिक : कोरोनाचा प्रादूर्भाव नियंत्रणात येत असला तरीदेखील किमान तापमान आता वेगाने घसरु लागले असून कोरोनाच्या दुसऱ्या लाटेचीही शक्यता वर्तविली जात असताना दुसरीकडे नाशिककरांनी कोरोनापासून बचावासाठी सांगितलेल्या उपाययोजना व घ्यावयाच्या काळजीकडे दुर्लक्ष करताना दिसत आहे. पोलीस आयुक्तालय हद्दीत सार्वजनिक ठिकाणी वावरताना मास्कचा वापर अनिवार्य असतानाही मास्क न वापरणे पसंत करणाऱ्या २० हजार बेफिकिर नाशिककरांवर आतापर्यंत पोलिसांनी कारवाई केली आहे.

कोरोनापासून बचावासाठी सार्वजनिक ठिकाणी वावरताना मास्कचा वापर बंधनकारक करण्यात आला आहे. मास्क न वापरो, सामाजिक अंतर पाळवयाच्या नियमांचे उल्लंघन करणे, सार्वजनिक ठिकाणी सर्रासपणे थुंकताना आढळून आल्यास पोलिसांकडून गुन्हे दाखल केले जात आहे. शहरात आतापर्यंत तब्बल २० हजार लोक मास्कचा वापर सार्वजनिक ठिकाणी न करताना पोलिसांना आढळले.

कोरोनाचा सामना करण्यासाठी सध्या 'मास्क हेच औषध' असे सरकारकडून तसेच प्रशासनाकडून वारंवार सांगितले जात आहे; मात्र मास्क वापराबाबत नागरिकांमधये लॉकडाऊन शिथिलतेनंतर वेगाने उदासिनता वाढू लागल्याचे चित्र पहावयास मिळत आहे. शहर व परिसरात कोरोनाचे रुग्ण आढळूनच येत नाही, असे अजिबात नाही. यामुळे कोरोनापासून बचावासाठी प्रतिबंधात्मक उपाययोजनांकडे कानाडोळा करणे 'महाग' पडू शकते, त्यामुळे नागरिकांनी गर्दीच्या ठिकाणी विशेषत: सार्वजनिक ठिकाणी वावरताना मास्क अवश्य लावावा आणि 'सोशल डिस्टन्स'बाबत सतर्क रहावे, असे आवाहन पोलीस आयुक्त दीपक पाण्डेय यांनी केले आहे.