मालेगाव मनपा क्षेत्रात नागरिकांना मास्क अनिवार्य

मालेगाव : लॉकडाऊननंतर मिशन बिगीनअंतर्गत नागरिकांसाठी विविध गोष्टी, सोयीसवलती सुरू व खुल्या करण्यात आलेल्या आहेत; परंतु अजूनही कोरोनाचा धोका कमी झालेला नाही. संभाव्य कोरोनाच्या दुसऱ्या लाटेच्या पार्श्‍वभूमीवर प्रशासन सर्व प्रकारच्या सतर्कता बाळगत आहे. याच धर्तीवर शहरात विनामास्क फिरणाऱ्या नागरिकांवर महापालिका, महसूल व पोलीस प्रशासनाकडून दंडवसुलीची संयुक्त कारवाई करण्यात येणार आहे, असे मनपा आयुक्त त्र्यंबक कासार यांनी विभागप्रमुखांच्या बैठकीत सांगितले.

-------------------------------

कोरोनाचा संपूर्ण बीमोड करण्यासाठी आजघडीला प्रभावी लस किंवा औषध उपलब्ध नाही. म्हणून सद्य:स्थितीत प्रतिबंध हाच उपचार आहे. मास्क व सॅनिटायझरचा वापर आणि सामाजिक अंतर पाळणे या गोष्टी महत्त्वाच्या आहेत. कोरोनाची साखळी पूर्णपणे तोडायची असेल तर सुरक्षित अंतर पाळणे, मास्कचा नियमित वापर व सॅनिटायझरचा वापर या गोष्टींचा अवलंब करणे अत्यंत गरजेचे आहे. नागरिकांनी मास्क लावूनच कामानिमित्त बाहेर फिरावे. मास्क न वापरणाऱ्या नागरिकांवर आता महानगरपालिका व पोलीस आणि महसूल प्रशासन यांचे संयुक्त पथक दंडात्मक कारवाई करून दंड वसूल करणार आहे. यांची नागरिकांनी नोंद घ्यावी, असे आवाहन करण्यात आले.