किरकोळ वादातून उपसले हत्यार

 नाशिक : कामाच्या पैशाची मागणी केल्याचा राग आलेल्या संशयिताने एकास शिवीगाळ करून ब्लेडने वार केल्याची घटना शुक्रवारी (दि़३) रात्रीच्या सुमारास वडाळागावात घडली़ पोलिसांनी दिलेल्या माहितीनुसार विशाल वानखेडे (रा. आकाश बेकरीजवळ, वडाळागाव) या युवकाने संशयित मेराज अब्दुल गफार शेख (४१, रा. व्हिसन सोसायटी, वडाळारोड, आयटी पार्कजवळ) यांच्याकडे फॅब्रिकेशनचे काम केले होते. या कामाचे राहिलेले पैसे देण्याची मागणी वानखेडे याने केली असता त्याचा राग येऊन संशयित शेख याने वानखेडेला शिवीगाळ केली़ तसेच हातातील ब्लेडने त्याच्या छातीवर वार केले़ याप्रकरणी इंदिरानगर पोलिसांनी संशयित शेख याच्या विरोधात गुन्हा दाखल करून अटक केली आहे.
म्हसरूळच्या युवकावर चॉपरने वार
नाशिक : मागील भांडणाची कुरापत काढून एका युवकास तिघांनी मारहाण करून चॉपरने वार केल्याची घटना शनिवारी (दि़४) सायंकाळी दिंडोरी रोडवरील गुलमोहोरनगरमध्ये घडली़ म्हसरूळ पोलिसांनी दिलेल्या माहितीनुसार निवृत्ती दौलत धनगर (रा. वैदूवाडी, म्हसरूळ गाव, दिंडोरीरोड) या युवकाचे संशयित मंगेश साळवे, सागर त्रिभूवन, बंटी (पूर्ण नाव माहिती नाही) यांच्याशी
भांडण झाले होते.
या तिघांनीही सायंकाळी साडेसात वाजेच्या सुमारास निवृत्ती धनगर यास गुलमोहोरनगरला गाठत भांडणाची कुरापत काढून शिवीगाळ व मारहाण केली, तर संशयित मंगेश साळवे याने धनगरच्या डोक्यात चॉपरने वार केले़ याप्रकरणी म्हसरूळ पोलिसांत गुन्हा दाखल करण्यात आला आहे. (प्रतिनिधी)