डिसेंबरमध्ये १९ हजारांहून अधिक दस्त नोंदणी

नाशिक : बांधकाम व्यवसायातील मरगळ झटकण्यासोबतच या व्यवसायावर आधारित सिमेंट, स्टील व अन्य बांधकाम साहित्य उत्पादक उद्योगांना उभारी देण्यासाठी राज्य सरकारने मुद्रांक शुल्कात दिलेली ३ टक्के सवलतीची मुदत गुरुवारी (दि. ३१) संपुष्टात आली आहे; मात्र या सवलतीचा लाभ घेण्यासाठी नाशिककरांनी घरखरेदीला उत्स्फूर्त प्रतिसाद दिला. विशेष म्हणजे कोरोनाचे संकट लक्षात घेऊन सरकारने तीन टक्के सवलत दिल्याने डिसेंबर २०२० अखेर ४२० कोटी रुपयांच्या महसुलाचे लक्ष्य निर्धारित केले असताना तब्बल ४७३ कोटी २५ लाख रुपयांचा महसूल प्राप्त झाला आहे.

मुद्रांक शुल्कातील सवलतीचा लाभ घेण्यासाठी अनेक नागरिकांनी गुरुवारी जिल्ह्यातील सातही उपनिबंधक कार्यालयांमध्ये गर्दी करून तीन टक्के मुद्रांक शुल्काची रक्कम जमा करून पुढील चार महिन्यांत दस्त नोंदणी प्रक्रिया करण्याची संधी प्राप्त केली आहे. दरम्यान, ३१ मार्चपर्यंत मुद्रांक शुल्क सवलतीचा लाभ घेऊ न शकलेल्या ग्राहकांसाठी ३१ मार्चपर्यंत दोन टक्के सवलत मिळणार आहे. या कालावधीत दस्त नोंदणी करणाऱ्या ग्राहकांना चार टक्के मुद्रांक शुल्क भरून खरेदी-विक्रीचे व्यवहार करता येणार आहे. दरम्यान, व्यवहार पूर्ण झालेले ग्राहक कागदपत्रांची पूर्तता आणि वेगवेगळ्या तांत्रिक कारणांनी दस्त नोंदणी करू शकत नसल्याने, त्यांनी आता मुद्रांक शुल्क भरून उर्वरित प्रक्रिया पुढील १२० दिवसांत पूर्ण करून तीन टक्के सवलत मिळविण्याचा निर्णय घेतला. त्यामुळे अनेक ग्राहकांचा मुद्रांक शुल्क भरण्याकडे कल दिसून आल्याने उपनिबंधक कार्यालयांमध्ये गर्दी दिसून आली. दस्त नोंदणी करणारे ग्राहक आणि मुद्रांक शुल्क जमा करणाऱ्यांची गर्दी नियंत्रित करण्यासाठी जिल्ह्यातील सर्व सातही मुद्रांक शुल्क कार्यालये सायंकाळी उशिरापर्यंत सुरू असल्याचे मुद्रांक जिल्हाधिकारी कैलास दवंगे यांनी सांगितले.

इन्फो -

मुद्रांक शुल्क वसुली

महिना - दस्त संख्या - वसुली

एप्रिल - ००० - ०००

मे - २२४७ - १७ कोटी ३६ लाख

जून - ८०१३ - ५३ कोटी ८० लाख

जुलै - १०,५२९ - ६६ कोटी

ऑगस्ट -१०,५०२ - ६१ कोटी ८७ लाख

सप्टेंबर - ११,४७२ - ५३ कोटी ६५ लाख

ऑक्टोबर - १३,३६२ - ६८ कोटी २१ लाख

नोव्हेंबर - १२,६५९ - - ६६ कोटी १८ लाख

डिसेंबर - १८,८९७ - ८६ कोटी १८ लाख

(फोटो क्रमांक ८१,८२)