नाशिकमध्ये सातपूर भागात अतिक्रमण काढण्याची कारवाई सुरू

महापालिका अतिक्रमण विभागाने त्रंबकरोडच्या बाजूने महादेव वाडीतुन शिवम टॉकीज कडे जाणाऱ्या 15 मीटर रस्त्यावरील अतिक्रमण केलेल्यांच्या घरांवर मार्किंग केले.

नाशिक: नाशिक महापालिका आयुक्त आणि महापौर यांच्या खुर्च्या जप्त करण्याची नामुष्की आल्यानंतर अखेरीस आज पासून सातपूर येथ शिवम टॉकीज जवळचे अतिक्रमण हटवण्याची पालिकेकडून पूर्व तयारी सुरू झाली आहे. शिवम टॉकीज जवळील मनपाच्या रस्त्यावर झोपडपट्टी असून ती हटवून आपल्या टॉकीज मध्ये जाण्यास रस्ता मोकळा मिळावा यासाठी टॉकीज मालकाने न्यायालयात याचिका दाखल केली होती.  

न्यायालयाने 1991 मध्ये अतिक्रमण हटविण्याचे आदेश देऊनही ते हटविले गेले नाही त्यामुळे न्यायालयाच्या आदेशानुसार काल महापौर आणि आयुक्तांची खुर्ची जप्त करण्यासाठी बेलीफ आले होते. त्यावेळी आज म्हणजे शुक्रवार पासून अतिक्रमण हटविण्याचे लेखी आश्वासन दिले होते. त्यानुसार महापालिका अतिक्रमण विभागाने त्रंबकरोडच्या बाजूने महादेव वाडीतुन शिवम टॉकीज कडे जाणाऱ्या 15 मीटर रस्त्यावरील अतिक्रमण केलेल्यांच्या घरांवर मार्किंग केले. महापालिकेचा अतिक्रमण विभागाचा पूर्ण ताफा,अधिकारी,कर्मचारी हजर असून काही वेळातच अतिक्रमण काढण्यात येणार आहे.