Nashik: जिममध्ये ओळख केली, पुढे मैत्री झाली, प्रेमाचा बनाव, अन लग्नाचे आमिष दाखवून बलात्कार

Nashik Crime News: एका जिममध्ये पीडित महिलेसोबत ओळख करून पुढे मैत्री वाढवत नंतर प्रेमाचा बनाव रचून महिलेला लग्नाचे आमिष दाखवून वेळोवेळी शारीरिक संबंध ठेवून पीडितेला तीनदा गर्भवती केल्याची घटना घडली.

- अझहर शेख  
नाशिक - एका जिममध्ये पीडित महिलेसोबत ओळख करून पुढे मैत्री वाढवत नंतर प्रेमाचा बनाव रचून महिलेला लग्नाचे आमिष दाखवून वेळोवेळी शारीरिक संबंध ठेवून पीडितेला तीनदा गर्भवती केल्याची घटना घडली. संशयिताने पीडित महिलेला तीनवेळेस गर्भपात करण्यास भाग पाडले, असे फिर्यादीत म्हटले आहे. इंदिरानगर पोलिसांनी संशयित इसमाविरुद्ध बलात्काराचा गुन्हा दाखल केला आहे.

 एका जिममध्ये जाणाऱ्या महिलेसोबत संशयित संदीप दिघे याने २०२१ ते २०२२ या कालवधीत ओळख करून पुढे मैत्रीतून प्रेमाचा बनाव करत जवळीक वाढविली. यादरम्यान संदीप याने महिलेला लग्नाचे आमिष दाखविले. त्यावेळी तो स्वत: विवाहित होता, असे फिर्यादीत म्हटले आहे. कोरोना काळात पीडितेला कोरोना झाला असता संशयित संदीप हा तीची काळजी करत रुग्णालयात ये-जा करून देखभाल करत होता. नोव्हेंबर २०२१साली त्याने पीडितेच्या खोलीवर येत शारीरिक संबंध निर्माण केले. त्यानंतर वेळोवेळी महिलेसोबत संभोग करत तिला जानेवारी २०२२ साली गर्भवती केले. ही बाब पीडितेने संदीपच्या लक्षात आणून दिली असता ‘तुझ्या घरच्यांना सांगून टाकू तेव्हा आपण सर्वांना विश्वासात घेऊन सांगू असे सांगत सध्या बाळ नको...’ म्हणून पटवून देत गर्भपाताच्या गोळ्या आणून दिल्या. त्यामुळे तिचा गर्भपात झाला. त्यानंतर ऑगस्ट २०२२साली पुन्हा पीडितेचा गर्भपात करण्यात आला. त्यावेळी संशयित संदीपचे अजुन एका महिलेसोबत अफेअर सुरू असल्याचे पीडितेच्या लक्षात आल्याने पीडितेने त्यास विचारणा केली होती, असे फिर्यादीत म्हटले आहे.

गेल्यावर्षी नोव्हेंबर महिन्यात पुन्हा पीडित महिला त्याच्यापासून गर्भवती झाली, हे त्याला समजले असता त्याने शिवीगाळ करत मारहाण करण्यास सुरुवात केली. बळजबरीने खाद्यपदार्थामध्ये गर्भपाताच्या गोळ्या टाकून दिल्याने महिलेचा तिसऱ्यांदा गर्भपात झाला, असे पीडितेने फिर्यादीत म्हटले आहे. याप्रकरणी इंदिरानगर पोलिसांनी पीडित महिलेच्या फिर्यादीवरून संशयित संदीपविरुद्ध बलात्कार व गर्भपातास भाग पाडल्याप्रकरणी गुन्हा दाखल केला आहेे. पुढील तपास इंदिरानगर पोलिस करत आहेत.