नाशिककर गारठले; थंडीचा कडाका वाढला

हवामान अन‌् हलक्या सरींचा वर्षाव अशा विचित्र वातावरणाचा नाशिककर आठवडाभरापूर्वी अनुभव घेत होते. मागील चार दिवसांपासून आकाश निरभ्र झाले असून, लख्ख सूर्यप्रकाश पडत आहे. रविवारी कमाल तापमान २७.४ अंश तर किमान तापमान १२.२ अंश सेल्सिअस इतके नोंदविले गेले होते. दोन दिवसात किमान तापमानाचा पारा थेट चार अंशांनी खाली घसरला.

शहराचे वातावरण थंड होऊ लागले असून, किमान तापमानाचा पारा या आठवड्यात वेगाने घसरण्याची शक्यता हवामान केंद्राकडून वर्तविली जात आहे. उत्तरेकडील शीतलहरी राज्याच्या वेशीवर आल्याने शहराच्या वातावरणात अचानक गारठा वाढू शकतो, असे हवामान अभ्यासकांचे म्हणणे आहे. ढगाळ स्थिती दूर झाल्यामुळे सध्या कोरडे वातावरण अनुभवयास येत आहे. अरबी समुद्रात मागील आठवड्यात कमी दाबाचा पट्टा निर्माण झाल्याने वातावरणातून थंडी गायब झाली होती. राज्यातील विविध शहरांमध्ये पुढील दोन ते तीन दिवसांत किमान तापमानाचा पारा झपाट्याने खाली येण्याची शक्यता वर्तविली जात आहे. शहरात रविवारी सायंकाळपासून थंड वारे वेगाने वाहू लागल्याने वातावरणात कमालीचा गारठा जाणवत आहे. नागरिक शेकोट्या व उबदार कपड्यांचा आधार घेत थंडीपासून बचाव करत आहेत.

--इन्फो--

२०१८ ची पुनरावृत्तीची शक्यता

दोन वर्षांपूर्वी २९ डिसेंबर २०१८ रोजी नाशिक शहराच्या किमान तापमानाचा पारा ५.१ अंशापर्यंत घसरला होता. यावर्षी पुनरावृत्ती होण्याची शक्यता नाकारता येत नाही. कारण मागील तीन दिवसांपासून तापमानात वेगाने घसरण होत आहे. त्याअगोदर २०१० साली डिसेंबर महिन्यात पारा ५.४ अंशापर्यंत घसरला होता. या दोन वर्षांत डिसेंबरअखेरीस नाशिककरांनी कडाक्याची थंडी अनुभवली होती. या वर्षांचा अपवाद वगळता जानेवारी, फेब्रुवारीमध्ये पारा ४ व ५ अंशापर्यंत घसरल्याची नोंद आहे.

---इन्फो---

उबदार कपडे खरिदेवर भर

थंडीचा कडाका वाढताच उबदार कपड्यांच्या खरेदीची नाशिककरांची लगबग बाजारपेठेत पाहावयास मिळत आहे. रविवारपासून शरणपूररोडवरील तिबेटियन बाजार, मेनरोड, शालीमार या भागातील दुकानांमध्ये उबदार कपडे खरेदी करण्यासाठी नागरिकांची झुंबड उडत आहे. लहानग्यांपासून मोठ्यांपर्यंत सर्वांसाठी उबदार कपडे खरेदीवर भर दिला जात आहे.

--इन्फो--

शहराचे किमान तापमान असे.. (अंश सेल्सिअसमध्ये)

सोमवारी (दि.१४) - १८

मंगळवारी (दि.१५)- १५.४

बुधवारी (दि.१६)- १६

गुरुवारी (दि.१७)- १७

शुक्रवारी (दि. १८)- १५.१

शनिवारी (दि. १९)- १४.२

रविवारी (दि. २०)- १२.२

सोमवारी (दि. २१)- ९.१

मंगळवारी (दि.२२)- ८.४