आर्ची-परशासाठी नाशिककर ‘सैराट’

कार्यक्रम गुंडाळला : प्रेक्षकांची हुल्लडबाजी; पोलिसांचा सौम्य लाठीमार

नाशिक : अवघ्या महाराष्ट्राचे लक्ष वेधून घेणाऱ्या आर्ची-परशाच्या ‘सैराट’ जोडीला बघण्यासाठी हजारो प्रेक्षकांची चोपडा बॅँक्वेट हॉलमध्ये आयोजित ‘फॅशन शो’ला प्रचंड गर्दी लोटली. दोन तासांनी आर्ची-परशाची जोडी व्यासपीठावर येताच जमलेल्या प्रेक्षकांचा ताबा सुटला अन् सर्वांनी सेल्फी घेण्यासाठी एकच धाव घेतल्याने सर्वत्र पळापळ होऊन सुरक्षिततेला धोका निर्माण झाल्याने अवघ्या काही सेकंदांतच आर्ची-परशाला व्यासपीठ सोडावे लागले.
धन्वंतरी इन्स्टिट्यूट आॅफ डिझाईन अ‍ॅन्ड टेक्नोलॉजी संस्थेच्या वतीने ‘इंटरनल इलेजन्स’ या फॅशन-शोचे गंगापूररोडला आयोजन करण्यात आले होते. या कार्यक्रमाचे मुख्य आकर्षण ‘सैराट’ फेम अभिनेता आकाश ठोसर (परशा), अभिनेत्री रिंकू राजगुरू (आर्ची) असल्याने हजारो नाशिककरांनी गर्दी केली होती. सहा वाजेपासून तरुणाईने कार्यक्रमस्थळाला वेढा घातला होता. प्रेक्षकांची वाढणारी गर्दी बघता सरकारवाडा पोलीस ठाण्याच्या वतीने वाढीव पोलीस बंदोबस्त तैनात करण्यात आला होता. सात वाजता फॅ शन शो ला गोंधळातच प्रारंभ झाला. पासधारकांची हॉलमध्ये गर्दी वाढल्याने खासगी सुरक्षारक्षकांनी तातडीने मुख्य दरवाजा बंद केला. हॉलच्या प्रवेशद्वारावर पासधारक प्रेक्षकांची गर्दी लोटली. दरम्यान, प्रचंड गोंधळ झाल्याने पोलीस व सुरक्षारक्षकांनी गर्दीला बाहेर लोटण्याचा प्रयत्न केला. ‘सैराट’ झालेल्या प्रेक्षकांनी हॉलच्या खिडक्यांमधून उड्या मारत प्रवेश केला.
पुढील अर्ध्या तासात फॅशन शो चे तीन राऊंड सादर झाले. साडेआठ वाजता ‘आर्ची-परशा’ जोडीचे व्यासपीठावर आगमन होताच उपस्थितांचा जीव सैराट झाला अन् गोंधळाला सुरुवात झाली. गोंधळातच आर्ची-परशाने नाशिककरांना हात जोडून काही सेकं दांची झलक दिली. मात्र प्रेक्षक थेट व्यासपीठावर चढल्याने बंदोबस्तातच आर्ची-परशाला परतावे लागले.