नाशिकमध्ये पोलीस अधिका-याच्या गाडीची काच फोडून रोकड लंपास

नाशिक : पोलीस निरीक्षकाच्या स्कॉर्पिओ वाहनाची काच फोडून चोरट्यांनी ७० हजार रुपयांची रोकड असलेली बॅग चोरून नेल्याची घटना मंगळवारी (दि़२७) दुपारच्या सुमारास द्वारका परिसरातील काठे गल्लीत घडली़ विशेष म्हणजे चोरीचा हा प्रकार सीसीटीव्हीत कैद झाला असून या प्रकरणी भद्रकाली पोलीस ठाण्यात चोरीचा गुन्हा दाखल करण्यात आला आहे़

ठळक मुद्दे द्वारका परिसरातील काठे गल्लीतील घटनाचोरीचा प्रकार सीसीटीव्हीत कैद

नाशिक : पोलीस निरीक्षकाच्या स्कॉर्पिओ वाहनाची काच फोडून चोरट्यांनी ७० हजार रुपयांची रोकड असलेली बॅग चोरून नेल्याची घटना मंगळवारी (दि़२७) दुपारच्या सुमारास द्वारका परिसरातील काठे गल्लीत घडली़ विशेष म्हणजे चोरीचा हा प्रकार सीसीटीव्हीत कैद झाला असून या प्रकरणी भद्रकाली पोलीस ठाण्यात चोरीचा गुन्हा दाखल करण्यात आला आहे़

पोलिसांनी दिलेल्या माहितीनुसार मंगळवारी दुपारी तीन वाजेच्या सुमारास मूळचे धुळ्याचे व सध्या पिंपळगाव येथे कार्यरत असलेले पोलीस निरीक्षक व्ही़ आऱ देसले हे पत्नी व चालकासह गृहोपयोगी साहित्य खरेदीसाठी आपल्या स्कॉर्पिओ (एमएच १८, झेड ८१००) या चारचाकी वाहनाने आले होते़ द्वारका परिसरातील काठे गल्लीमध्ये गाडी लावून हे तिघे काही वेळासाठी दुकानात गेले असता चोरट्यांनी गाडीची पुढील काच फोडून रोख रक्कम ठेवलेली बॅग चोरून नेली़

भरदिवसा घडलेल्या या घटनेमुळे परिसरात खळबळ उडाली आहे़ या घटनेची माहिती मिळताच सहायक पोलीस आयुक्त विजयकुमार चव्हाण, गुन्हे शाखेचे निरीक्षक आनंद वाघ, भद्रकाली पोलीस ठाण्याचे वरिष्ठ पोलीस निरीक्षक मंगलसिंग सूर्यवंशी, कमलाकर जाधव हे घटनास्थळी दाखल झाले. त्यांनी परिसरातील सीसीटीव्ही फुटेज तपासले असता यामध्ये एक तरुण बॅग घेऊन जाताना दिसत असून त्याचा शोध सुरू आहे़ दरम्यान, पोलीस निरीक्षकांची वाहनेही चोरटे सोडत नाही तिथे सर्वसामान्यांची काय व्यथा अशी चर्चा आहे़