मंडईत नव्हे, रस्त्यावरच भाजीबाजार

शहरातील सराफ बाजारात वर्षानुवर्षे भरणाऱ्या फुलबाजारामुळे वाहतुकीला अडथळा निर्माण होत असल्याच्या तक्रारीची दखल घेत महापालिकेने गेल्या आठवड्यात अतिक्रमण विरोधी मोहीम राबविली व फुलविक्रेत्यांना गणेशवाडीतील भाजीमार्केटमध्ये जागा दिली.

नाशिक : शहरातील सराफ बाजारात वर्षानुवर्षे भरणाऱ्या फुलबाजारामुळे वाहतुकीला अडथळा निर्माण होत असल्याच्या तक्रारीची दखल घेत महापालिकेने गेल्या आठवड्यात अतिक्रमण विरोधी मोहीम राबविली व फुलविक्रेत्यांना गणेशवाडीतील भाजीमार्केटमध्ये जागा दिली. मात्र महापालिकेची पाठ फिरताच विक्रेते पुन्हा मूळ जागेवर येऊन बसले. त्यातून बराच वाद झाला असून, तो अद्यापही धुमसत आहे. शहरात फुलबाजाराप्रमाणेच रस्त्यावर भरणारे अनधिकृत भाजीबाजार हीदेखील एक डोकेदुखी झाली आहे. घराजवळच दररोज ताजा भाजीपाला मिळतो समाजाची ती गरज असली तरी, या बाजारामुळे वाहतुकीस होणारा अडथळा व त्यातून होणारे अडथळे या महत्त्वाच्या बाबींकडे दुर्लक्ष करून चालणार नाही. त्यासाठी नागरिकांना व भाजीविक्रेत्यांना सोयीचे होईल, असे धोरण महापालिकेने आखणे गरजेचे आहे. ‘लोकमत’ चमूने शहर व परिसरातील रस्त्यावर भरणाºया भाजीबाजाराची पाहणी करून त्यावर उपाययोजनांची माहिती संकलित केली. त्यात अनेक ठिकाणी अधिकृत बाजारासाठी जागा दिलेली असतानाही त्याकडे पाठ फिरवून विक्रेत्यांनी रस्त्यावर ठाण मांडल्याचे दिसून आले. तर काही ठिकाणी विक्रेत्यांना पर्यायी जागा देऊनही त्यांना जागेत स्वारस्य नसल्याचे जाणवले.
इंदिरानगरला अधिकृत बाजाराकडे पाठ
इंदिरानगर परिसरात महापालिकेने साईनाथनगर चौफुली तसेच कलानगर येथे अधिकृत भाजीबाजार बांधून दिलेला असतानाही सावरकर चौक, राजे छत्रपती चौक ते सार्थकनगर बस थांब्यादरम्यान भरणारा अनधिकृत भाजीबाजार नागरिकांची डोकेदुखी वाढवित आहे. परिसरातील ग्राहकांची गरज ओळखून सावरकर चौकात अनधिकृत भाजीबाजार सुरू करण्यात आला असून, त्यामुळे वाहतूक कोंडी होऊन लहान-मोठे अपघात होतात. यासंदर्भातील तक्रारींची दखल घेऊन महापालिकेच्या वतीने साईनाथनगर चौफुली येथे भाजीबाजार बांधून देण्यात आला. सुमारे दीड वर्षापूर्वी भाजीबाजार साईनाथनगर येथील चौफुलीलगत स्थलांतरित केला, परंतु सायंकाळ होताच काही भाजीविक्रेते सावरकर चौकात ठाण मांडून बसतात त्यामुळे वाहतुकीस अडथळा निर्माण होत आहे. तसाच प्रकार कलानगर येथे घडतो आहे. याठिकाणी महापालिकेने सुमारे दहा वर्षांपूर्वी भाजीबाजार बांधून दिला आहे. तरीही राजे छत्रपती चौक ते सार्थकनगर बस थांबा या रस्त्याच्या दुतर्फा भाजीविक्रेते व्यवसाय करतात.
पंचवटीत पर्यायी जागेचा अभाव
पंचवटी येथील दिंडोरीरोड व पेठरोडवर दररोज सायंकाळी रस्त्यावरच भरणाºया अनधिकृत भाजीबाजारामुळे वाहनधारकांना वाहने नेणे तर सोडाच, परंतु रस्त्याने पायी ये-जा करणाºया नागरिकांना जीव मुठीत धरून चालावे लागते. मुख्य वाहतूक असलेल्या रस्त्यावर भरणाºया भाजीबाजारामुळे नागरिकांसह मनपा प्रशासनाची डोकेदुखी वाढत असली तरी प्रशासनाकडून कोणताही तोडगा काढला जात नसल्याने सध्या रस्त्यावरील भाजीबाजार प्रश्न प्रलंबित आहे. पेठरोडवर भाजीपाला विक्री करणाऱ्यांसाठी भाजीमंडई नाही की मोकळा भूखंड उपलब्ध नाही परिणामी विक्रेत्यांना रस्त्यावर बाजार थाटावा लागतो. अशीच परिस्थिती दिंडोरीरोड मुख्य वाहतूक रस्त्यावर दिसून येते. दररोज सायंकाळी महालक्ष्मी सिनेमा प्रवेशद्वार ते दिंडोरी नाक्यापर्यंत शेकडो भाजीपाला विक्रेते रस्त्यालगत बसलेले दिसून येतात. परिणामी वाहनधारकांना वाहने नेताना कसरत करावी लागते. त्याचप्रमाणे दर आठवड्यात हिरावाडी तसेच औरंगाबाद रोडला भरणाºया आठवडे बाजारामुळे वाहतूक कोंडी निर्माण होत असते.