बोलेरो उलटून झालेल्या अपघातात एक ठार

उड्डाणपुलावरील घटना : अंबड पोलीस ठाण्यात गुन्हा दाखल; मृत युवक सिडकोतील

नाशिक : भरधाव महिंद्र बोलेरो गाडी उलटून झालेल्या अपघातात सिडकोतील एकाचा मृत्यू झाला, तर दुसरा गंभीर जखमी झाल्याची घटना बुधवारी रात्री घडली़ या अपघाताची अंबड पोलीस ठाण्यात नोंद करण्यात आली आहे़
अंबड पोलिसांनी दिलेल्या माहितीनुसार रवींद्र देवचंद शितोळे (दत्त चौक, सिडको) हा गरवारे पॉर्इंटवरून बोलेरो वाहन घेऊन मुंबई नाक्याकडे येत होता़ त्यासोबत मुकुंद सुकदेव गायकवाड (३०, बजरंग चौक, विजयनगर, सिडको) हा त्याचा सहकारीदेखील होता़ भरधाव असलेल्या या गाडीवरील चालकाचा हॉटेल एक्स्प्रेस इनजवळ ताबा सुटला व तिने चार-पाच पलट्या खाऊन ती उलटली व गंभीर अपघात झाला़
या अपघातात मुकुंद गायकवाड हे जागीच ठार झाले, तर त्यांच्यासोबत असलेले रवींद्र शितोळे हे गंभीर जखमी झाले़ त्यांना पाथर्डी फाट्यावरील एका खासगी रुग्णालयात उपचारासाठी दाखल करण्यात आले आहे़ दरम्यान, या अपघाताची अंबड पोलीस ठाण्यात नोंद करण्यात आली आहे़ (प्रतिनिधी)