ढगाळ वातावरणामुळे पिकांवर रोगांचा प्रादुर्भाव

मानोरी : अरबी समुद्रात तयार झालेल्या कमी दाबाच्या क्षेत्रामुळे गेल्या तीन दिवसांपासून परिसरात ढगाळ वातावरण, दाट धुके पडत आहे. सकाळी सात वाजेच्या सुमारास तुरळक अवकाळी पावसाच्या हलक्या सरी पडल्यानंतर रब्बी हंगामातील गहू, हरभरा, लाल कांदा लागवड, द्राक्ष उत्पादक शेतकरी हवालदिल झाला आहे. ढगाळ वातावरणामुळे पिकांवर रोगांचा प्रादुर्भाव होण्याच्या भीतीने सातत्याने औषध फवारणी करावी लागत असल्याचे चित्र दिसून येत आहे.

येवला तालुक्यातील मानोरी बुद्रुक, देशमाने, मुखेड, जळगाव नेउर, शिरसगाव, पिंपळगाव लेप, जऊळके आदी परिसरात मुसळधार पावसामुळे रोपांचे अतोनात नुकसान झाल्यानंतर नव्याने रोपे विकत घेऊन उशिरा उन्हाळ कांदा लागवडीसाठी शेतकरी व्यस्त आहे. मात्र, ही नव्याने केलेली कांदा लागवड ढगाळ वातावरण आणि दाट धुक्याच्या कचाट्यात सापडली आहे. कांद्याचे शेंडे पिवळसर पडण्याच्या भीतीने शेतकरी वर्गाकडून औषध फवारणी केली जात असून, याचा मोठा आर्थिक फटका शेतकऱ्यांना बसत आहे.

दरम्यान, या ढगाळ वातावरणामुळे आणि अवकाळी पावसामुळे रब्बी हंगामातील पिकांबरोबर द्राक्ष उत्पादक शेतकरी देखील पूर्णतः धास्तावला असून, मोठ्या मेहनतीने घेतलेल्या द्राक्षबागेला काही दिवसांपूर्वी चांगल्या प्रकारे फळे लागली आहेत. वातावरणातील बदलामुळे सातत्याने औषध फवारणी करून द्राक्षबाग जगवलेली असताना आता चांगल्या प्रकारे फळे लागली आहेत. तुरळक पडणाऱ्या अवकाळी पावसाने आणि पहाटे पडणाऱ्या धुक्यामुळे द्राक्षफळावर हे पाणी साचून काळे डाग पडत असून. यातून मोठ्या प्रमाणात द्राक्ष उत्पादक शेतकऱ्यांना फटका बसणार आहे. द्राक्षामधून वर्षातून एकदाच चांगल्या प्रकारे शेतकरी उत्पादन घेत असतात. वर्षाकाठी लाखो रुपये खर्चून द्राक्षाचे उत्पादन घेतले जाते. ढगाळ वातावरण आणि अवकाळी पावसाच्या सरींनी मागील तीन दिवसांपासून शेतकऱ्यांच्या चिंतेत मोठी भर पडली असून, या हवामान बदलाचा द्राक्ष उत्पादनावर मोठा परिणाम होणार असल्याचे द्राक्ष उत्पादक शेतकऱ्यांकडून सांगितले जात आहे.

-----------------

मागील तीन दिवसांच्या ढगाळ वातावरणामुळे द्राक्षावर मोठ्या प्रमाणात परिणाम झाला असून, खराब वातावरणामुळे दररोज औषध फवारणी करावी लागत आहे. पुढचे काही दिवस वातावरण ढगाळ असल्याने द्राक्षबागा वाचविण्यासाठी महागड्या औषधांची फवारणी करावी लागणार असल्याने मोठ्या प्रमाणात आर्थिक फटका देखील बसणार आहे.

- कल्याण कोटकर, द्राक्ष उत्पादक, शिरसगाव लौकी.