पाण्डेय यांच्याकडून गुंडांना मोक्का अन‌ 'मौका' २५० गुन्हेगारांना सुधारण्याची शेवटची संधी !

शहरातील विभाग-१मधील ६९, विभाग-२मधील ६४, विभाग-३मधील ५४ आणि विभाग-४मधील ६३ गुन्हेगारांनी गुन्हेगारीच्या मार्गावर आता यापुढे चालणार नसल्याचे लेखी वचन पोलिसांना दिले आहे.

ठळक मुद्दे२५० गुन्हेगारांनी बंधपत्र पोलिसांकडे लिहून दिले गुन्हेगारीचा मार्ग सोडण्याची शेवटची संधी १०८सराईत गुन्हेगारांवर मोक्काचा फास आवळला

नाशिक : शहर व परिसरात वाढती गुन्हेगारी नियंत्रणात आणण्यासाठी पोलिस आयुक्त दीपक पाण्डेय यांनी एकीकडे मोक्का तर दुसरीकडे 'मौका' अशी समांतर कार्यवाही सध्या सुरु केली आहे. गुन्हेगार सुधार योजनेअंतर्गत पोलिसांनी आतापर्यंत २५० गुन्हेगारांना वर्तणुक सुधारण्याची संधी दिली आहे. तसेच ज्यांनी गुन्हेगारीचा मार्ग सोडण्यास असमर्थता दर्शविली अशा १०८सराईत गुन्हेगारांवर मोक्काचा फास आवळला आहे.

पोलीस आयुक्तालयाकडून गुन्हेगार सुधार योजनेअंतर्गत शहरातील दोन्ही परिमंडळातील चारही विभागांच्या १३ पोलीस ठाण्यांमधील सराईत गुन्हेगारांना बोलावून त्यांचे समुपदेशन करत सामान्य नागरिकांप्रमाणे वर्तणूक करुन मुख्य प्रवाहात येण्यासाठी पोलिसांनी गुन्हेगारांना वाट खुली करुन दिली आहे. या योजनेचा लाभ देत सुमारे २५० गुन्हेगारांकडून बंधपत्र घेत त्यांना गुन्हेगारीचा मार्ग सोडण्याची शेवटची संधी देण्यात आली आहे.
शहरात गेल्या मंगळवारपासून (दि.२२) गुन्हेगार सुधार योजनेअंतर्गत विविध पोलीस ठाण्यांचा एकत्रित उपक्रम घेतला जात आहे. आतापर्यंत घेण्यात आलेल्या तीन गुन्हेगार सुधार मेळाव्यांमध्ये उपस्थित राहिलेल्या गुन्हेगारांपैकी एकुण २५० गुन्हेगारांनी चांगले वर्तन करणार असल्याचे बंधपत्र पोलिसांकडे लिहून दिले आहे. यामध्ये शहरातील विभाग-१मधील ६९, विभाग-२मधील ६४, विभाग-३मधील ५४ आणि विभाग-४मधील ६३ गुन्हेगारांनी गुन्हेगारीच्या मार्गावर आता यापुढे चालणार नसल्याचे लेखी वचन पोलिसांना दिले आहे.

'वॉच' ठेवण्यात येईल
पोलीस ठाणेनिहाय गुन्हेगारांची यादी तयार आहे. ज्या गुन्हेगारांनी बंधपत्रे लिहून दिली आहेत, त्यांच्याही नावांची यादी संबंधित पोलिस ठाण्याकडे असून वरिष्ठ पोलिस निरिक्षकांकडून ती यादी बीट मार्शलपासून तर गुन्हे शोधपथकापर्यत सर्वांना छायाचित्रांसह उपलब्ध करुन दिली जाणार आहे. यानुसार या गुन्हेगारांच्या वर्तणुकीवर पोलीस वॉच ठेवणार आहेत, असे पाण्डेय यांनी सांगितले.
---
सुधार योजनेतून अनावधानाने वाट चुकलेल्या गुन्हेगारांना सुधारण्याची संधी दिली जात आहे. त्यांना स्वयंरोजगार मिळवून देण्यासाठीदेखील प्रयत्न केले जातील. मात्र जे गुन्हेगार गुन्हेगारी प्रवृत्ती सोडणार नाहीत अशांची कुठलीही गय केली जाणार नाही. त्यांच्या गुन्हेगारीचा पुर्वइतिहास तपासून तडीपार, झोपडपट्टी दादा कायदा (एमपीडीए), मोक्का यासारखी कारवाई करण्यात येईल.
- दीपक पाण्डे्य, पोलिस आयुक्त