महावितरण विभाग दोनला साडेचार कोटींचा भरणा

महावितरण विभाग दोनला साडेचार कोटींचा भरणा

नाशिकरोड : महावितरण कंपनीने वीज बिलापोटी रद्दबातल ठरविलेल्या ५०० व एक हजारांची नोट स्वीकारण्याचे मान्य केल्यानंतर शुक्रवारी एक दिवसांत नाशिक विभाग २ मधून तब्बल साडेचार कोटीची वसुली झाली आहे. अगोदर महावितरणने १००० व ५०० च्या नोटा स्वीकारण्यास नकार दिला होता. मात्र ऊर्जामंत्र्यांनी आदेश देताच वीज बिल केंद्रे उघडण्यात आली.केंद्राने ५०० व एक हजाराची नोट चलनातुन रद्दबातल करण्याचा निर्णय जाहीर केल्यानंतर महावितरण कंपनीने देखील वीज बिलापोटी त्या नोटा स्वीकारण्यास बुधवार, गुरूवार असमर्थता दर्शविली होती. मुख्यमंत्री देवेंद्र फडणवीस, उर्जामंत्री व महावितरणचे अधिकारी यांची गुरूवारी सायंकाळी संयुक्त बैठक झाल्यानंतर संपूर्ण महाराष्ट्रात वीज बिलापोटी ग्राहकांकडून पाचशे व एक हजाराच्या रद्द केलेल्या नोटा स्वीकारण्याचे जाहीर केले होते.
महावितरणचे वीज बिल भरणा केंद्र खाजगी वीज कलेक्शन सेंटर, एटीएम मशीन या ठिकाणी शुक्रवारी सकाळी ९ वाजेपासून सायंकाळी ७ वाजेपर्यंत ग्राहकांसाठी वीज बिलाची रक्कम स्वीकारण्यात येत होती. यामध्ये शुक्रवारी एका दिवसातच नाशिक विभाग-२ मधुन जवळपास साडेचार कोटीची चालु व थकीत वीज बिलांची वसुली झाली आहे. सायंकाळी ७ वाजता खाजगी वीज बिल कलेक्शन सेंटर बंद करण्यात आले होते.