मालेगाव अपर पोलीस अधीक्षकपदी पोद्दार रुजू

मालेगाव अपर पोलीस अधीक्षकपदी पोद्दार रुजू

लोकमत न्यूज नेटवर्क
मालेगाव : येथील अपर पोलीस अधीक्षकपदाचा पदभार हर्ष पोद्दार यांनी मंगळवारी स्वीकारला आहे. अपर पोलीस अधीक्षक राकेश ओला यांची नागपूर येथे उपायुक्तपदी बदली झाल्याने त्यांच्या जागेवर पोद्दार यांची नियुक्ती झाली होती. पोद्दार यांची नियुक्ती व ओला यांची बदली गेल्या महिनाभरापूर्वीच झाली होती; मात्र महापालिका निवडणुकीमुळे बदलीला स्थगिती देण्यात आली होती. महापालिकेचा निकाल लागल्यानंतर मंगळवारी पोद्दार यांनी पदभार स्वीकारला आहे.
मूळ कोलकाता येथील रहिवासी असलेल्या पोद्दारांना सामाजिक कार्य व जनतेचे प्रश्न सोडविण्याची तळमळ आहे. मंगळवारी त्यांनी पदभार घेऊन शहरातील परिस्थितीचा आढावा घेतला. यावेळी पोलीस उपअधीक्षक अजित हगवणे, अशोक नखाते, प्रभारी पोलीस निरीक्षक व शहरातील विविध राजकीय, सामाजिक संस्थांच्या पदाधिकाऱ्यांनी त्यांची भेट घेऊन स्वागत केले आहे.बेस्ट आॅफिसर पुरस्कारहर्ष पोद्दार यांनी इंग्लंडमधील आॅक्सफर्ड विद्यापीठातून एलएलएम पदवी घेतली आहे. तसेच पोलीस दलात येण्यापूर्वी त्यांनी लंडन येथे वकिली केली आहे. हैदराबाद येथील नॅशनल पोलीस ट्रेनिंग अकॅडमीमध्ये त्यांनी आयपीएसचे प्रशिक्षण पूर्ण केले आहे. यापूर्वी त्यांनी औरंगाबाद, कोल्हापूर या ठिकाणी सेवा दिली आहे. पोलीस दलातील चांगल्या कामगिरीमुळे त्यांना ‘जातीय सलोखा’ गृहमंत्री पुरस्कार व बेस्ट आॅफिसर पुरस्काराने गौरविण्यात आले आहे.