कालव्यांच्या सर्वेक्षणासह दुरुस्ती करण्याचे आदेश

जलसंपदा विभागाच्या यंत्रणेला आवर्तन नियोजन व कालव्याच्या दुरु स्तीचे सर्वेक्षण करून दुरुस्ती करण्याचे आदेश जिल्ह्याचे पालकमंत्री छगन भुजबळ यांनी मंत्रालयात आयोजित बैठकीत दिले.

ठळक मुद्देमंत्रालयात बैठक : कालवा सल्लागार समिती

कळवण : जलसंपदा विभागाच्या यंत्रणेला आवर्तन नियोजन व कालव्याच्या दुरु स्तीचे सर्वेक्षण करून दुरुस्ती करण्याचे आदेश जिल्ह्याचे पालकमंत्री छगन भुजबळ यांनी मंत्रालयात आयोजित बैठकीत दिले.
नाशिक जिल्हा रब्बी व उन्हाळा हंगाम कालवा सल्लागार समितीची बैठक नाशिकचे पालकमंत्री छगन भुजबळ यांच्या अध्यक्षतेखाली मंत्रालयात संपन्न झाली. यावेळी अर्जुनसागर (पुनंद) व चणकापूर प्रकल्प यावर्षी पूर्ण क्षमतेने भरले आहेत. सन २०१९-२० च्या रब्बी हंगामात अर्जुनसागर (पुनंद) प्रकल्पातून कालव्यांना रब्बीसाठी किमान एक व उन्हाळ्यात पिण्याच्या पाण्यासाठी किमान तीन आवर्तने आरक्षित करावीत व कळवण तालुक्यातील कालव्याचे सर्वेक्षण करून तात्काळ दुरु स्ती करावी, अशी मागणी आमदार नितीन पवार यांनी केली. यावेळी छगन भुजबळ यांना कळवण व सुरगाणा तालुक्यातील सिंचन प्रश्नासंदर्भातील निर्माण झालेल्या अडचणी व विविध मागण्यांचे निवेदन आमदार पवार यांनी दिले. चणकापूर प्रकल्प, गिरणा डाव्या व उजव्या कालव्यास रब्बी हंगामात एक आवर्तनाचे नियोजन आहे. तसेच सिंचन व बिगरसिंचन आवर्तन एकत्रितपणे नियोजन करून होणाऱ्या बचतीतून मर्यादित क्षेत्रासाठी उन्हाळ्यात आवर्तन देण्याचे निर्देश भुजबळ यांनी बैठकीत दिले. यावेळी जिल्ह्यातील लोकप्रतिनिधीसह जलसंपदाचे मुख्य अभियंता किरण कुलकर्णी, अधीक्षक अभियंता अलका आहेरराव व अधिकारी उपस्थित होते. नाशिक जिल्ह्यातील रब्बी व उन्हाळा हंगामासाठी सिंचन व बिगरसिंचन आवर्तनासाठी पाण्याचा दुरूपयोग होणार नाही याकडे लक्ष देऊन सिंचन आवर्तनाचे योग्य नियोजन करावे, असे निर्देश भुजबळ यांनी बैठकीत दिले. यावेळी कृषिमंत्री दादा भुसे यांच्यासह जिल्ह्यातील लोकप्रतिनिधी उपस्थित होते.