हैदराबादला जाणाऱ्या विमानात बॉम्बची अफवा

विमान कंपनीशी वाद झाल्याने एका प्रवाशाने हा प्रकार केल्याचे उघड झाले आहे. हैदराबादला जाण्यासाठी एका प्रवाशाने ऑनलाइन बुकिंग केले. मात्र बुकिंग करताना काही तांत्रिक अडचण निर्माण झाल्याने त्याचे बुकिंग होऊ शकले नाही. यामुळे ओझर विमानतळावर येत त्या प्रवाशाने येथे सेवा देणाऱ्या विमान उड्डाण कंपनीच्या कर्मचाऱ्यांसोबत वाद घातला. दरम्यान, कर्मचाऱ्यांनी त्यास दुसरे तिकीट काढण्यास सांगितले असता त्याने तिकीट न काढता हुज्जत घालून ओझर विमानतळावरील तिकीट काउंटर सोडले. येथून बाहेर पडल्यानंतर नाशिक ग्रामीण पोलीस नियंत्रण कक्षात निनावी कॉल करून नाशिकवरून हैदराबाद येथे जाणाऱ्या एका विमानात बॉम्ब असल्याचे सांगितले. यानंतर ग्रामीण पोलिसांनी ताबडतोब बॉम्ब शोधक व नाशक पथकाला सोबत घेत ओझर विमानतळ गाठले. सर्व प्रवाशांना सुरक्षितरीत्या विमानातून खाली उतरवून विमानाची तपासणी करण्यात आली. या वेळी विमानामध्ये कुठल्याही प्रकारची बॉम्बसदृश वस्तू आढळून आली नाही. त्यामुळे प्रवाशाने हा खोडसाळपणा केल्याचे स्पष्ट झाले आणि एक प्रकारे अफवा पसरविल्यामुळे त्याच्याविरुद्ध पोलिसांनी कारवाई सुरू केली आहे.

इन्फो...

ग्रामीण पोलीस नियंत्रण कक्षाला बॉम्ब ठेवल्याचा फोन केल्यानंतर संशयित उच्चभ्रू प्रवाशाने ओझर येथून पळ काढला होता. पोलिसांनी विमानतळावरील सीसीटीव्ही फुटेज तपासले असता त्यामध्ये एक प्रवासी काउंटरवरील कर्मचाऱ्यांसोबत वाद घालताना दिसून आला. यावरून प्रवाशाचे वर्णन आणि त्याने ज्या मोबाइल क्रमांकावरून पोलीस नियंत्रण कक्षाला फोन केलेला होता तो क्रमांक पोलिसांनी ट्रॅक करून त्याला नाशिक शहरातून रात्री दहा वाजेच्या सुमारास ताब्यात घेतले. त्याची रात्री उशिरापर्यंत चौकशी सुरू होती. त्याच्याविरुद्ध अफवा पसरविल्याप्रकरणी गुन्हा दाखल करण्याचे काम रात्री उशिरापर्यंत ग्रामीण पोलिसांकडून केले जात होते.

इन्फो...

विमानामध्ये कुठल्याही प्रकारची बॉम्बसदृश वस्तू आढळून आलेली नाही. प्रवाशांनी घाबरून न जाता अफवा पसरवू नये, अफवांवर विश्वास ठेवू नये, असे आवाहन ग्रामीण पोलीस अधीक्षक सचिन पाटील यांनी केले आहे. नाशिक ते हैदराबाद असे उड्डाण करणारे हे विमान रात्री अकरा वाजेपर्यंत विमानतळावरून टेक ऑफ झालेले नव्हते.