आॅस्ट्रेलियात गुंजणार सावरकरांची गीते

नाशिक : आॅस्ट्रेलियातील सिडनी शहरात रविवारी (दि.२८) वीर सावरकर विश्व साहित्य संमेलन होत आहे

लोकमत न्यूज नेटवर्क
नाशिक : आॅस्ट्रेलियातील सिडनी शहरात रविवारी (दि.२८) वीर सावरकर विश्व साहित्य संमेलन होत असून, या संमेलनात सावरकरांनी लिहिलेली गीते सादर करण्यासाठी नाशिकच्या गायिका गीता माळी यांना निमंत्रित करण्यात आले आहे. त्यानिमित्ताने आॅस्ट्रेलियाच्या भूमीत वेगवेगळ्या शहरातही गीता माळी यांच्या गायनाच्या मैफली होणार आहेत.
आॅस्ट्रेलियात होणाऱ्या सावरकर विश्व साहित्य संमेलनात देश-विदेशांतून सावरकरप्रेमी साहित्य रसिक उपस्थित राहणार आहेत. या संमेलनात वीर सावरकर यांनी लिहिलेल्या गीतांवर आधारित कार्यक्रम सादर करण्यासाठी नाशिकच्या गायिका गीता माळी यांना निमंत्रित करण्यात आले आहे. या संमेलनाला अभिनेता शरद पोंक्षे, विचारवंत सच्चिदानंद शेवडे यांचीही विशेष उपस्थिती लाभणार आहे. याशिवाय, या संमेलनानिमित्त तेथील महाराष्ट्र मंडळामार्फत सिडनी, मेलबोर्न, ब्रिस्बेन अशा शहरांमध्ये गीता माळी यांच्या स्वतंत्र गायनाच्या मैफली रंगणार आहेत. गीता माळी यांनी यापूर्वी अमेरिकेतही आपल्या गायनाच्या मैफली सजविल्या आहेत.