म.फुलेनगरच्या सरपंचपदी सविता गांगुर्डे

उमराणे : देवळा तालुक्यातील म.फुलेनगर ( खारीपाडा ) ता.देवळा येथील नऊ सदस्यीय ग्रामपंचायतीच्या सरपंचपदी सविता कल्पेश गांगुर्डे यांची तर उपसरपंचपदी मोनाली हरिदास जाधव यांची बिनविरोध निवड करण्यात आली आहे.

ठळक मुद्दे उपसरपंचपदी मोनाली जाधव यांची बिनविरोध निवड

मागील महिन्यात झालेल्या ग्रामपंचायत निवडणुकीवेळी गावाच्या सर्वांगीण विकासासाठी खारीपाडा येथील ग्रामस्थांनी एकत्र येत निवडणूक न लढविता बिनविरोध निवडणूक करण्याचा ठराव केला होता. त्या अनुषंगाने नऊ सदस्यांची बिनविरोध निवड करण्यात आली होती. सरपंच व उपसरपंच पदाच्या निवडीसाठी निवडणूक निर्णय अधिकारी म्हणून देवळा तालुका कृषी पर्यवेक्षक प्रदीप कंखर यांच्या अध्यक्षतेखालील ग्रामपंचायत कार्यालयात बैठक बोलविण्यात आली होती. यात निर्धारित वेळेत सरपंच,उपसरपंच पदासाठी दोघांचा एकमेव अर्ज दाखल झाल्याने निवडणूक अधिकारी कंखर यांनी सरपंचपदी सविता गांगुर्डे व उपसरपंचपदी मोनाली जाधव यांची बिनविरोध निवड झाल्याचे जाहीर केले. निवड प्रक्रिया पार पाडण्यासाठी ग्रामसेवक पी.एस.सोनजे यांनी मदत केली. निवडीप्रसंगी सदस्य प्रवीण अहिरे,गोकुळ गांगुर्डे, किशोर जाधव, इंदुबाई शिरसाठ,लताबाई पगार, जयश्री अहिरे,गोरख माळी आदींसह तंटामुक्ती अध्यक्ष दीपक गांगुर्डे व ग्रामस्थ मोठ्या संख्येने उपस्थित होते.