पिंपळगाव वाखारी येथे वादळाने शाळेचे पत्रे उडाले

पिंपळगाव वाखारी येथे वादळाने शाळेचे पत्रे उडाले

 पिंपळगाव वाखारी : अवकाळी पावसाच्या जोरदार वादळात येथील बेघरवस्ती जि. प. प्राथमिक शाळेच्या इमारतीचे पत्रे उडाल्याने शाळेचे नुकसान झाले असून, पहाटे घडलेल्या घटनेमुळे सुदैवाने कोणतीही जीवितहानी झाली नाही.
शुक्रवारी पहाटे वादळी वाऱ्यासह अवकाळी पावसाने जोरदार हजेरी लावली. यामुळे बेघरवस्ती येथील जि. प. च्या प्राथमिक शाळेच्या पडवी व खोलीचे पत्रे उडाले. सिमेंट पत्रे नसल्याने सर्व पत्रे फुटून पत्र्यांचा खच वर्गात निर्माण झाला होता. सुदैवाने रात्रीच्या वेळेत हे नैसर्गिक संकट आल्याने विद्यार्थी बचावले आहेत.
शालेय वेळेत ही घटना घडली असती तर विद्यार्थ्यांच्या जिवाला मोठा धोका निर्माण झाला असता. पडलेले पत्रे व इमारतीचे नुकसान बघून विद्यार्थी व पालकांत भीतीचे वातावरण निर्माण झाले आहे. (वार्ताहर)