नाशिक जिल्ह्यामध्य धावत्या शिवशाहीला भीषण आग; सुदैवाने जीवित हानी टळली

नाशिक ते छत्रपती संभाजी नगर राज्य मार्गावर शिंपीटाकळी फाटा येथे ही दुर्घटना घडली.

-योगेश सगर

कसबे सुकेणे:- निफाड तालुक्यातील चांदोरी नजीक शिंपी टाकळी फाटा येथे नाशिक ते छत्रपती संभाजी नगर राज्य मार्गावर रविवारी (दि. १०)दुपारी सव्वा दोन वाजेच्या सुमारास धावत्या शिवशाही बसला भीषण आग लागली. सुदैवाने या दुर्घटनेत बस मधील पाच ते सहा प्रवासी सुखरूप असल्याची प्राथमिक माहिती समोर आली आहे.

नाशिक ते छत्रपती संभाजी नगर राज्य मार्गावर शिंपीटाकळी फाटा येथे ही दुर्घटना घडली, शिवशाही बस (क्रमांक एम एच ०९, एफ एल ०४७७) ही नाशिकहून छत्रपती संभाजी नगर कडे जात असताना धावत्या बस मधून इंजिनच्या बाजूने धूर निघत असल्याचे चालकाच्या लक्षात आले. चालकाने तत्काळ बस थांबवली व बस मधील पाच ते सहा प्रवासी घाईने खाली उतरले, त्यानंतर काही क्षणातच बसने पेट घेतला व या आगीत ही संपूर्ण बस जळून खाक झाली,

आगीच्या या घटनेमुळे नाशिक ते छत्रपती संभाजी नगर राज्य मार्गावर वाहतूक ठप्प झाली, मोठ्या प्रमाणात गर्दी जमली होती, चांदोरी येथील आपत्ती व्यवस्थापन पथकातील जवान व स्थानिक नागरिकांनी आग विझवण्याचे प्रयत्न केले,. दरम्यान या घटनेत सर्व प्रवासी सुखरूप आहेत.