कडक अंमलबजावणीमुळे बाधितांच्या संख्येला ब्रेक

निफाड तालुक्यातील मागील महिन्यात कोरोना रुग्णांची दररोज किमान ३०० पेक्षा जास्त संख्या वाढत होती. निफाड तालुका हा संपूर्ण नाशिक जिल्ह्यात ग्रामीण भागात कोरोना रुग्णसंख्या सर्वाधिक असणारा तालुका ठरला होता. आता पाच- सहा दिवसांपासून ती संख्या एकशे तीस रुग्णांवर आलेली दिसत आहे. निफाड तालुक्याच्या उपविभागीय अधिकारी डॉक्टर अर्चना पठारे, निफाडचे तहसीलदार शरद घोरपडे व गट विकास अधिकारी संदीप कराड यांनी निफाड तालुक्यात कडक लाॅकडाऊनचा निर्णय घेतला आणि गावोगावी धडक लाॅकडाऊनची अंमलबजावणी सुरू झाली. इतकेच नव्हे तर बाजारावर होणारी गर्दी लक्षात घेऊन काही दिवस शेतीमालाचे लिलाव बंद असल्याने प्रशासनाला कोरोना रोखण्यात कमालीचे यश आले. आणि त्याचबरोबर घोरपडे यांनी निफाड तालुक्यातील गावोगावी कोरोना रुग्ण असणारा परिसरातील रुग्ण घराबाहेर पडू नये व घरातच असावेत, कोरोना फैलाव होऊ नये यासाठी गावोगावी प्रतिबंध क्षेत्राकरिता एक पोलीस कर्मचारी व दोन शिक्षकांची नेमणूक केली व या अंमलबजावणीनंतर कोरोना रुग्ण आढळणाऱ्या परिसरात प्रतिबंध क्षेत्रावर अनिर्बंध व अंमलबजावणी सुरू झाली आहे.

दि.१५ मे रोजी रात्री शासकीय आकडेवारी उपलब्ध झाली असून नाशिक ग्रामीणमध्ये नाशिक १ हजार ८४५, बागलाण ५४७, चांदवड ५६९, देवळा ४८८, दिंडोरी ७३४, इगतपुरी १८४, कळवण ४९३, मालेगाव २९१, नांदगाव २८८, निफाड १ हजार ४, पेठ ८९, सिन्नर १ हजार ७५, सुरगाणा २९१, त्र्यंबकेश्वर १७३, येवला १४८ असे एकूण ८ हजार २१९ पॉझिटिव्ह रुग्णांवर उपचार सुरू आहेत. आता निफाड तालुक्यातील जनता मास्कसह फिरताना दिसत आहे. मात्र, या कोरोनाच्या दुसऱ्या लाटेकडे लोक कोरोनाबाबत आता चिंतेची बाब म्हणून पाहत आहे.

निफाड तालुक्यातील लासलगाव, पिंपळगाव बसवंत निफाड, सायखेडा व विंचूर येथील बाजार आवारांवर दररोज कांदा व शेतीमालाचे लिलाव होतात. यामुळे देखील कोरोना पाॅझिटिव्ह रुग्णाची संख्या वाढत आहे, असे दिसून येताच लासलगाव येथील बाजारपेठेत सलग दोन आठवडे तर पिंपळगाव बसवंत बाजार समितीने एक सप्ताहात लिलाव बंद ठेवले आहेत, तसेच अनपेक्षित निकटचे नातेवाईक व मित्र यांच्या कोरोना पाॅझिटिव्ह अहवालानंतर मागील सप्ताहात मृत्यूच्या घटनेने तालुक्यातील जनता हादरली. आता जिल्हाधिकारी सूरज मांढरे यांच्या आदेशानुसार नाशिक जिल्ह्यात शेतीमालाचे लिलाव दि.13 ते मे दरम्यान बंद झाले आहेत. गावोगावी जनता कर्फ्यू शंभर टक्के पाळला जात आहे.