कंपनीमालकाची गळफास घेऊन आत्महत्या

शिखरेवाडी येथील ड्रीम अ‍ॅव्हेन्यू सोसायटीत राहणारे, सिन्नर व पुण्याला कॉपरची कंपनी असलेल्या मालकाने गळफास घेऊन आत्महत्या केली.

नाशिकरोड : शिखरेवाडी येथील ड्रीम अ‍ॅव्हेन्यू सोसायटीत राहणारे, सिन्नर व पुण्याला कॉपरची कंपनी असलेल्या मालकाने गळफास घेऊन आत्महत्या केली.
पुणे- अर्णेश्वर संतनगर येथील स्वामी विवेकानंद सोसायटीत राहणारे सुरेंद्र शंकर साळेकर (४८) यांची पुणे व सिन्नर एमआयडीसीत कॉपरची कंपनी आहे. साळेकर यांचा शिखरेवाडीतील ड्रीम अ‍ॅव्हेन्यू सोसायटी बी- विंग-३०२ हा फ्लॅट असून, तेथे ते एकटे राहत होते. साळेकर यांच्याकडे जीएसटी मोठ्या प्रमाणात थकल्याने जीएसटी विभागाचे पथक सोमवारी सिन्नर येथील कंपनीत जाऊन तेथून तपास करत शिखरेवाडीतील ड्रीम अ‍ॅव्हेन्यू सोसायटीत आले. साळेकर यांच्या फ्लॅटचा दरवाजा अनेकवेळा ठोठावूनदेखील कुठलाही प्रतिसाद मिळत नव्हता. पथकाने सुरक्षारक्षक व आजूबाजूचे रहिवासी यांच्या मदतीने साळेकर यांचा फ्लॅटचा दरवाजा तोडला असता हॉलमध्ये छताच्या पंख्याला दोरी बांधून काही तासांपूर्वीच साळेकर यांनी आत्महत्या केल्याचे उघडकीस आले. साळेकर यांनी आर्थिक कारणामुळे आत्महत्या केल्याचा प्राथमिक अंदाज आहे. याप्रकरणी उपनगर पोलीस ठाण्यात अकस्मात मृत्यूची नोंद करण्यात आली.
आनंदनगरला टोळक्याचा तरुणावर प्राणघातक हल्ला
नाशिकरोड : आनंदनगर कदम लॉन्सजवळील साईबाबा मंदिराजवळ युवकावर टोळक्याने प्राणघातक हल्ला करून जिवे ठार मारण्याचा प्रयत्न केला.
जयभवानीरोड आडकेनगर येथे राहाणारा उद्देश अनिलसिंग चंदेल याने दिलेल्या फिर्यादीत म्हटले आहे की, मित्र साहील म्हस्के याच्यासोबत रविवारी रात्री साडेनऊच्या सुमारास साईबाबा मंदिराजवळील उद्यानामध्ये दारू पित बसले होते. यावेळी संशयित विजय बहेनवाल उर्फ चंग्या (रा. फर्नांडीसवाडी), मारी घोरपडे, बडे, गणेश सोनवणे, तेजस वाघ, नीरज भारद्वाज व इतर ५-६ जण तिथे आले. विजय उर्फ चंग्या याने ‘क्या तू मेरे को मारने की बात करता है क्या’ असे म्हणून उद्देश याला सर्वांनी लाथा-बुक्यांनी मारहाण करत कोयत्याने डोक्यावर, गालावर व पाठीवर चॉपरने वार करून जखमी केले. तसेच साहील म्हस्के याच्या हातावरदेखील चॉपरने वार करून जखमी केले. याप्रकरणी उपनगर पोलीस ठाण्यात गुन्हा दाखल करण्यात आला आहे.
नाचण्याच्या वादावरून युवकावर कोयत्याने वार
नाशिकरोड : जेलरोड ढिकलेनगर येथे हळदी समारंभात नाचताना धक्का लागला असता त्याचा जाब विचारल्याचा राग येऊन युवकावर कोयत्याने वार करून जखमी केले.
जेलरोड पूर्वांचल कॉलनीत साईज्योत बंगला येथे राहणारे ऋषिकेश रवींद्र चौधरी याने दिलेल्या फिर्यादीत म्हटले आहे की, सोमवारी रात्री १० वाजेच्या सुमारास एका हळदी समारंभात नाचत असताना यावेळी सागर दुसाने याचा धक्का लागल्याने त्याला व्यवस्थित नाचण्याचे सांगितले असता त्यास राग आल्याने त्याने व त्याचा मित्र रवि लिपणे याने लाकडी दांडुक्याने मारहाण केली, तर सागरने लोखंडी कोयत्याने डोक्यावर वार करून गंभीर जखमी केले. याप्रकरणी नाशिकरोड पोलीस ठाण्यात सागर दुसाने, रवी लिपणे यांच्याविरुद्ध गुन्हा दाखल करण्यात आला आहे.