विनाकारण प्रवेश करणाऱ्यांवर कारवाई करा

मालेगाव:- शहरात संचारबंदीचे उल्लंघन करणाऱ्या तसेच विनामास्क फिरणाऱ्यांवर कडक कारवाई करण्याचे निर्देश अप्पर पोलीस अधीक्षक चंद्रकांत खांडवी यांनी शुक्रवारी प्रभारी अधिकाऱ्यांना दिले आहेत. शहर व परिसरात संचारबंदीची प्रभावीपणे अंमलबजावणी केली जात आहे. तरीदेखील काही नागरिक विनामास्क व विनाकारण घराबाहेर पडताना आढळून आले आहेत. या पार्श्वभूमीवर अप्पर पोलीस अधीक्षक खांडवी यांनी शुक्रवारी पोलीस ठाणेनिहाय आढावा घेतला. यावेळी त्यांनी शहर वाहतूक शाखेच्या अधिकारी व कर्मचाऱ्यांना शहराच्या प्रवेशद्वारावरील गिरणा पुलावर नाकाबंदी करून अत्यावश्यक सेवा व शासनाने निर्देशित केलेल्या नियमानुसार नागरिकांना प्रवेश देण्यात यावा, विनाकारण शहरात प्रवेश करणाऱ्यांवर कारवाई करावी असे सांगितले. छत्रपती शिवाजी महाराज पुतळा, मोसम पूल ,टेहरे चौफुली, चर्चगेट परिसरात नाकाबंदी करून नियमांचे उल्लंघन करणाऱ्यांवर कारवाई करण्याच्या सूचना खांडवी यांनी प्रभारी अधिकाऱ्यांना केल्या आहेत.