चौथ्या औद्योगिक क्रांतीचा लाभ घ्यावा

संजय जोशी : राज्यस्तरीय उद्यम कौस्तुभ पुरस्काराचे वितरण उत्साहात

नाशिक : माहिती तंत्रज्ञानात दिवसेंदिवस बदल होत असून, सर्वांनी तंत्रज्ञान अवगत करून घेणे आवश्यक आहे. सगळेच जग चौथ्या औद्योगिक क्रांतीच्या उंबरठ्यावर उभे असून, याचा फायदा उद्योगजगताने करून घ्यायला हवा, असे आवाहन भारतीय जनता पक्षाचे पूर्व राष्ट्रीय महामंत्री संजय जोशी यांनी ‘बीबीएन ग्लोबल’ यांच्यातर्फे आयोजित राज्यस्तरीय परिसंवाद तसेच ‘उद्यम कौस्तुभ’ पुरस्कार
वितरण समारंभाप्रसंगी व्यक्त केले. रविवारी अंबड येथील इंजिनिअरिंग क्लस्टर सभागृहात या कार्यक्रमाचे आयोजन करण्यात आले होते.
ब्राह्मण बिझनेस नेटवर्कतर्फे आयोजित या कार्यक्रमात पुढे बोलताना संजय जोशी यांनी ब्राह्मण समाजाने एकत्र येऊन तसेच समाजातील लोकांना बरोबर घेऊन उद्योगवाढीसाठी योग्य मदत करण्याचे आवाहन केले. समाजातील सर्वच घटकांचा विकास होणे आवश्यक असल्याचे जोशी यांनी यावेळी सांगितले. २१व्या शतकातील बदलत्या तंत्रज्ञानाचे सर्वांना प्रशिक्षण द्यायला हवे तसेच याप्रकारचे उद्योगमेळावे कायम आयोजित करून त्यात सगळ्यांना सामावून घेण्याचेही आवाहन जोशी यांनी यावेळी केले.