मालवाहू डंपरच्या धडकेत टेम्पोचालक ठार

नाशिक : भरधाव डंपरने दिलेल्या धडकेत मालवाहू टेम्पोचालक ठार झाला. या अपघातात अन्य एकजण जखमी झाला असून, हा अपघात भगूर-पांढुर्ली रस्त्यावर झाला. याप्रकरणी देवळाली कॅम्प पोलीस ठाण्यात अपघाताचा गुन्हा दाखल करण्यात आला आहे.

गोकुळ विजय कोठुरकर (२८, रा. राहुरी-विंचूर दळवी) असे मृत्यूमुखी पडलेल्या चालकाचे नाव आहे. या अपघातात निखील जाधव हे जखमी झाले आहेत. ते कोठुरकर यांचे मेव्हणे आहेत. हे दोघेही मंगळवारी (दि. १०) दुपारी भगूर येथून विंचूर दळवीच्या दिशेने टेम्पोतून (एमएच १५ जीव्ही ८६०८) प्रवास करत होते. यावेळी राहुरी शिवारात पांढर्लीकडून भगूरच्या दिशेने भरधाव जाणाऱ्या मालवाहू डंपरने (एमएच १८ एए १०२६) टेम्पोला धडक दिली. या अपघातात टेम्पोतील दोघे गंभीर जखमी झाले होते. त्यातील चालक कोठुरकर यांचा मृत्यू झाला असून, निखील जाधव हे जखमी आहेत. याप्रकरणी संतोष भागवत (रा. राहुरी विंचूर दळवी) यांनी दिलेल्या तक्रारीवरून डंपरचालक संजय हनुमंत सालुंखे (रा. चारणवाडी, दे. कॅम्प) याच्याविरूध्द गुन्हा दाखल करण्यात आला आहे.